पणजी: गोव्याच्या महिलांनी सीनियर टी-२० क्रिकेट स्पर्धेतील मोहिमेचा विजयी समारोप करताना आसामला ७१ धावांनी पराभूत केले. हर्षिता यादव (५८) व पूर्वजा वेर्लेकर (५६) यांनी दणकेबाज अर्धशतके नोंदविताना संघाला ११५ धावांची सलामी दिली.

एलिट ड गट सामना रविवारी छत्तीसगडमधील रायपूर येथील आरडीसीए मैदानावर झाला. गोव्याने नाणेफेक जिंकून प्रथम फलंदाजी करताना निर्धारित २० षटकांत ३ बाद १६६ धावा केल्या.

नंतर तनया नाईक (३-२५), पूर्वा भाईडकर (२-९) व सुनंदा येत्रेकर (२-१९) यांच्या प्रभावी गोलंदाजीच्या बळावर गोव्याने आसामचा डाव १६.५ षटकांत ९५ धावांत गुंडाळला. १७ वर्षीय हर्षिता सामन्याची मानकरी ठरली.

तिने ४६ चेंडूंतील खेळीत नऊ चौकार लगावले. पूर्वजा हिने आक्रमक खेळ करताना ४० चेंडूंतील खेळीत पाच चौकार व तीन षटकार मारले. हर्षिता व पूर्वजा यांनी १४.१ षटकांतच दमदार सलामी दिल्यामुळे गोव्याला मोठी धावसंख्या उभारणे सोपे ठरले. या दोघी एका धावेच्या अंतराने बाद झाल्यानंतर सुनंदा येत्रेकरने २२ चेंडूंत केलेल्या ३७ धावांमुळे गोव्याला दीडशतक पार करणे शक्य झाले.

संक्षिप्त धावफलक

गोवा : २० षटकांत ३ बाद १६६ (हर्षिता यादव ५८, पूर्वजा वेर्लेकर ५६, संजुला नाईक नाबाद १३, सुनंदा येत्रेकर ३७, तनिशा गायकवाड नाबाद १, मौसुमी नाराह ४-०-३१-२) वि. वि. आसाम : १६.५ षटकांत सर्वबाद ९५ (खुशी शर्मा १८, गायत्री गुरुंग १७, मैना नाराह १६, मेताली गवंडर ३-०-१८-१, सुनंदा येत्रेकर ३.५-०-१९-२, श्रेया परब २-०-२१-०, तनया नाईक ४-०-२५-३, विधी भांडारे १-०-३-०, पूर्वा भाईडकर ३-०-९-२).