इफ्फी’ दरवर्षी आपली प्रतिष्ठा अधिक उंचावत आहे. भारतीय आणि जागतिक सिनेविश्वाला जोडणारा महत्त्वपूर्ण सांस्कृतिक पूल म्हणून आपला झेंडा उंच ठेवत आहे. ‘इफ्फी’मध्ये विशेषत: लहान पण हृदयस्पर्शी चित्रपटांना चांगली संधी दिली जाते आणि त्यातून सादर झालेल्या कथांची दखल आंतरराष्ट्रीय पातळीवर घेतली जाते. भारतीय कथांचा सन्मान करणे आणि जागतिक पातळीवर नेण्याच्या योगदानाची प्रशंसा ‘इफ्फी’च्या भेटीदरम्यान तामिळनाडू भाजपचे उपाध्यक्ष के. अण्णामलाई यांनी केली.

गोव्यात ‘इफ्फी’ आणण्यामध्ये दिवंगत माजी मुख्यमंत्री मनोहर पर्रीकर यांचे योगदान त्यांनी आवर्जून अधोरेखित केले. अण्णामलाई म्हणाले की, इफ्फीला भेट देताना मला अत्यंत आनंद होत आहे.

गेली २१ वर्षे या महोत्सवाने गोव्याला आंतरराष्ट्रीय नकाशावर अधोरेखित केले आहे. त्यांनी पर्रीकरांच्या कार्याचा उल्लेख करत सांगितले की, मनोहर पर्रीकरांनी हा महोत्सव गोव्यात आणला ही गोव्याची मोठी भाग्याची गोष्ट आहे आणि ‘इफ्फी’ आता येथे कायमस्वरूपी स्थिरावला आहे.

अण्णामलाई यांनी महोत्सवाच्या बदलत्या स्वरूपाबाबत भाष्य केले. ते म्हणाले की, मोठ्या बजेटच्या चित्रपटांसोबत देशाच्या कानाकोपऱ्यातून येणाऱ्या लहान चित्रपटांना मिळणारा व्यासपीठ म्हणजे कलाकारांचा विजयच आहे. गेल्या काही वर्षांपासून ‘इफ्फी’ लघुपटांना, प्रदेशातील चित्रपटांना मोठी संधी देत आहे. केवळ ‘ब्लॉकबस्टर’च नाही, तर भारताचा आत्मा असलेल्या छोट्या चित्रपटांनाही येथे मान मिळतो.