Varsha Usgaonkar Konkani tiatr London: मराठी सिनेसृष्टीतील लोकप्रिय अभिनेत्री आणि गोव्याच्या कलाविश्वातील महत्त्वाचे व्यक्तिमत्त्व असलेल्या वर्षा उसगावकर यांनी सध्या एका खास कारणामुळे लक्ष वेधून घेतले आहे. गोव्यातील पारंपरिक नाट्यकला प्रकार 'तियात्र' चा एक व्हिडिओ त्यांनी सोशल मीडियावर शेअर केला आहे, ज्यात त्या लंडनमध्ये सादरीकरण करताना दिसत आहेत.

'देवाचें नांव जीतां हांव' ची लंडनमध्ये प्रस्तुती

वर्षा उसगावकर यांनी 'देवाचें नांव जीतां हांव' (Devachem Nanv Jietam Hanv) या प्रसिद्ध तियात्रमधील एका भागाचे सादरीकरण लंडनमध्ये केले. या व्हिडिओमध्ये त्या तियात्रमधील एक गाणे गाताना दिसत आहेत.

मारियानो फर्नांडिस लिखित या तियात्राची मध्यवर्ती संकल्पना प्रेम, कौटुंबिक संबंध, विश्वास आणि विश्वासघात या भोवती फिरते, तसेच गोव्यातील समाजातील आंतर-धर्मीय एकतेवरही तो प्रकाश टाकतो. या तियात्राची कथा जॅकोब, त्याची हिंदू पत्नी वर्षाआणि त्यांची मुले ध्रुवआणि मॅगी यांच्याभोवती फिरते.

'तियात्र' कलेचा वारसा

तियात्र ही कोंकणी भाषेतील एक लोकप्रिय संगीत नाट्यकला आहे, जी १२५ वर्षांहून अधिक जुनी आहे. ती नाटक, संगीत आणि नृत्याचा मिलाफ म्हणून ओळखली जाते. या कला प्रकारात मुख्य नाटक लहान अंकांत विभागलेले असते, ज्यामध्ये स्वतंत्र गीते समाविष्ट असतात.

या गाण्यांमधून अनेकदा सध्याच्या सामाजिक आणि राजकीय समस्यांवर भाष्य केले जाते.वर्षा उसगावकर यांच्या या लंडनमधील सादरीकरणामुळे गोव्याच्या पारंपरिक तियात्र कलेला आंतरराष्ट्रीय स्तरावर ओळख मिळाली आहे.