वास्को: काँग्रेसने गोव्यात आणलेल्या मोठमोठ्या प्रकल्पाचे श्रेय विद्यमान भाजप सरकार (BJP Government) घेऊन, जनतेच्या डोळ्यात धूळफेक करीत असल्याचा आरोप विरोधी पक्षनेते दिगंबर कामत यांनी केला आहे. मुरगावात पूर्ण झालेल्या राष्ट्रीय महामार्गाचा उड्डाणपूल काँग्रेसच्या (Congress) कार्यकाळातील होता. आता तो पूर्ण झाल्यानंतर त्याचे सुद्धा श्रेय भाजप (BJP) घेत असल्याची माहिती कामत यांनी दिली. (The BJP Government Takes Credit For The Project Brought To Goa By The Congress)

मुरगाव काँग्रेस उमेदवार संकल्प आमोणकर यांच्या जाहीरनाम्याचे प्रकाशन माजी मुख्यमंत्री तथा विरोधी पक्षनेते दिगंबर कामत (Digambar Kamat) यांच्या हस्ते करण्यात आला. यावेळी त्यांच्यासमवेत माजी नगराध्यक्षा शरद चोपडेकर, मुरगाव काँग्रेस प्रभारी तोफिक मोलानी, हारिफ शेख, दीक्षा तळवणेकर, उमेदवार संकल्प आमोणकर (Sankalp Amonkar) उपस्थित होते. पुढे बोलताना कामत म्हणाले की भाजपने कोणता विकास केला असे ते ठामपणे सांगू इच्छित आहे. मुरगावात अजूनही पिण्याच्या पाण्याचा प्रश्न जनतेला भेडसावत आहे.

काँग्रेस कार्यकाळात सुरू झालेले प्रकल्पाचे श्रेय घेण्याचे काम मात्र भाजपने केले असल्याचा आरोप दिगंबर कामत यांनी केला. पाण्याचा प्रश्न सोडवण्यात येत नाही आणि मोठ मोठे प्रकल्प भाजपच्या कार्यकाळात आणले आहे असे सांगून भाजप स्वतःची इज्जत घालवीत असल्याची माहिती कामत यांनी दिली. मी काँग्रेसचा सच्चा कार्यकर्ता असून मी कधीही पक्षश्रेष्ठींकडे मुख्यमंत्रीपदाची मागणी केलेली नाही. गोव्यात काँग्रेस पूर्ण बहुमत घेऊन सत्ता स्थापन करणार असल्याची माहिती शेवटी दिगंबर कामत यांनी दिली.