पणजी : गोव्यात पुढील मुख्यमंत्रिपदाच्या चेहऱ्याबाबत अजूनही अनिश्चितता कायम आहे. मावळते मुख्यमंत्री प्रमोद सावंत आणि आरोग्यमंत्री विश्वजीत राणे मुख्यमंत्रिपदावरुन आमनेसामने आल्याचं बोललं जात आहे. अशातच राज्यपाल पी एस श्रीधरन पिल्लई यांनी मंगळवारी शपथविधीसाठी राज्य विधानसभेचे विशेष अधिवेशन बोलावले आहे. विधानसभा निवडणुकीचे निकाल जाहीर झाल्यानंतर आता भाजप गोव्यात सलग तिसर्‍यांदा सरकार स्थापन करण्याच्या तयारीत आहे. याला गोव्यातील मगोप आणि तीन अपक्ष आमदारांचाही पाठिंबा आहे.

भाजपचे (BJP) दोन केंद्रीय निरीक्षक म्हणजेच पक्षाचे सरचिटणीस बीएल संतोष आणि केंद्रीय मंत्री पीयूष गोयल मुख्यमंत्रिपदाचा चेहरा ठरवण्यासाठी आज सोमवारी संध्याकाळी गोव्यात दाखल होणार आहेत. पक्षाच्या पदाधिकाऱ्यांनी गोव्यातील मुख्यमंत्री पदावर कोणत्याही दावा असल्याचं आणि वाद असल्याचंही नाकारलं आहे. भाजपचं केंद्रीय नेतृत्व चारही राज्यांच्या मुख्यमंत्र्यांसाठी (CM) एकत्रित शपथविधी सोहळ्याची योजना आखत आहे, मात्र गोव्यात मुख्यमंत्रीपदावरुन वाद असल्याची चर्चाही तेवढीच रंगताना दिसत आहे.

गोव्यात भाजपने 40 सदस्यीय विधानसभेच्या निवडणुकीत 20 जागा जिंकल्या, ज्यासाठी 14 फेब्रुवारी रोजी मतदान झाले. यात 10 मार्च रोजी विधानसभा निवडणुकीचे निकाल जाहीर झाले. भाजपला पूर्ण बहुमत मिळालं नसलं तरीही 3 अपक्ष आमदारांनी भाजपलाच आपला पाठिंबा घोषित केला आहे. शनिवारी गोव्याचे मावळते मुख्यमंत्री प्रमोद सावंत (Pramod Sawant) यांनी गोव्याचे राज्यपाल पी एस श्रीधरन पिल्लई यांची राजभवनात भेट घेतली आपल्या मुख्यमंत्रिपदाचा राजीनामा दिला. सरकार स्थापनेचा दावा करण्याची प्रक्रिया आधीच सुरू झाली आहे, म्हणून आपण राजीनामा दिला आहे, असं प्रमोद सावंतांनी स्पष्ट केलं आहे.