देशात आगामी काळात पाच राज्यांच्या विधानसभा निवडणुका होणार आहेत. यामध्ये गोवा राज्याचाही समावेश आहे. गोव्यात विधानसभेची जोरदार रणधुमाळी पाहायला मिळत आहे. राज्यामध्ये सत्तेत असणारा भाजप पुन्हा एकदा सत्ता मिळविण्यासाठी मतदारांना आकर्षित करत आहे. तर दुसरीकडे विरोधक भाजपला सत्तेपासून दूर ठेवण्यासाठी निकराने लढा देत आहेत. यातच गोव्यात नव्याने दाखल झालेल्या तृणमुलने महाराष्ट्रवादी गोमन्तक पक्षाबरोबर युती करत भाजपला पहिल्यांदा मोठा धक्का दिला. त्यानंतर राज्यामध्ये युतीचे सत्रचं सुरु झालं.

कॉंग्रेसने विजय सरदेसाई (Vijay Sardesai) यांच्या गोवा फॉरवर्ड (Goa Forward) पक्षाबरोबर युती करत आपली ताकद दाखविण्यास सुरुवात केली आहे. त्यातच महाराष्ट्राप्रमाणे गोव्यात देखील महाविकास आघाडीचा फॉर्म्युला आणण्यासाठी शिवसेना खासदार संजय राऊत प्रयत्न करत आहेत. कॉंग्रेसने मात्र या महाविकास आघाडीच्या प्रयोगाला कोणत्याही स्वरपाचा हिरवा कंदील दाखवलेला नाही. दरम्यान राष्ट्रवादी कॉंग्रेसचे प्रमुख नेते प्रफुल्ल पटेल (Praful Patel) आणि महाराष्ट्र सरकारमधील मंत्री जितेंद्र आव्हाड (Jitendra Awhad) उद्या गोव्याला जाणार आहेत. याच दरम्यान तिथे ते शिवसेनेबरोबर आघाडीबाबत करतील असं राजकीय तज्ञांकडून सांगण्यात येत आहे.

दरम्यान, राऊत यांनी माध्यमाशी बोलताना म्हटले होते की, ''महाराष्ट्रात आम्ही राष्ट्रवादी कॉंग्रेस आणि कॉंग्रेससोबत सत्तेमध्ये आहोत. मात्र गोव्याबद्दल विचार करायचा झाल्यास अद्याप कॉंग्रेससोबत कोणत्याही स्वरुपात जागा वाटपाचा फॉर्म्युला झालेला नाही. यामध्ये पक्ष म्हणून त्यांच्या काही मर्यादा असतील तशाच आमच्याही काही मर्यादा आहेत. आम्ही गोव्यातील चाळीस जागांसाठी उमेदवारांची यादी तयार करत आहोत, त्यानुसार आम्ही निवडणुका लढवू. त्यासाठी 18 आणि 19 तारखेला अम्ही पुन्हा एकदा गोव्याला चाललो आहे. तेव्हा आम्ही उमेदवारांची यादीही जाहीर करु.''