पणजी: आगामी गोवा विधानसभा निवडणुकीत मतदार कोणत्या एका पक्षाला जनादेश देणार का सरकार स्थापन करण्यासाठी विविध पक्षांना हातमिळवणी करावी लागणार हे 10 मार्चलाच स्पष्ट होईल. मात्र कॉंग्रेस आणि आम आदमी पार्टीने आतापासूनच निवडणुकीनंतर भाजप (BJP) विरोधी पक्षांबरोबर युती करण्याची तयारी दर्शवली आहे. (Goa Election 2022)

याबाबत बोलताना कोंग्रेसने नेते दिगंबर कामत म्हणाले की, कुणालाही बहुमत न मिळाल्यास भाजपला सत्तेपासून लांब ठेवण्यासाठी भाजप विरोधी पक्षांनी एकत्र येऊन यावर तोडगा काढला पाहिजे.

पत्रकारांशी बोलताना कामत म्हणाले, स्थानिक पातळीवर कोंग्रेसचे (Congress) आप आणि तूनमूलशी (TMC) युतीबाबत कोणतीही चर्चा झालेली नाही. मला राष्ट्रीय पातळीवर काही चर्चा झाली असल्यास मला त्याची माहिती नाही.

खाण घोटाळ्याप्रकरणी त्यांचे खाण संचालक अरविंद लोलियनकर यांना का अटक करण्यात आली, असे विचारले असता ते म्हणाले, “हा वेगळा विषय आहे. संचालकांची सही चुकल्यामुळे ती कारवाई करण्यात आली." शहा आयोगाच्या अहवालात नमूद केलेल्या 35,000 कोटी रुपयांच्या वसुलीबद्दल विशेषतः विचारले असता कामत म्हणाले की आयोगाने हा अंतिम आकडा असल्याचे सांगितले नाही.