पणजी : गोव्यात विधानसभा निवडणुकीचे निकाल लागून आठवडा उलटला तरीही अजून सत्तास्थापनेचा दावा भाजपने केलेला नाही. गोव्यात मुख्यमंत्रीपदावरुन मतभेद असल्याचीही चर्चा सुरु आहे. विद्यमान मुख्यमंत्र्यांसमोर विश्वजीत राणेंनी मुख्यमंत्रीपदावर दावा सांगितल्याचं बोललं जात आहे. आता गोवा भाजप प्रदेशाध्यक्ष सदानंद तानावडेंनी भाजपमध्ये कोणतेही मतभेद नसून सर्व एक आहेत, असं विधान केलं आहे. तसंच मुख्यमंत्रीपदावरुन कोणताही संभ्रम नसल्याचंही त्यांनी स्पष्ट केलं आहे.

गोव्याचे मुख्यमंत्री (CM) कोण होणार या चर्चेवर याआधीच पडदा पडला असला तरीही विश्वजीत राणेंच्या संभाव्य बंडाची चर्चा सुरुच आहे. गोव्याचे काळजीवाहू मुख्यमंत्री प्रमोद सावंत यांचंच नाव मुख्यमंत्रिपदासाठी निश्चित झाल्याची सूत्रांची माहिती आहे. मंत्रिमंडळाच्या 80 टक्क्यांपेक्षा जास्त जागांनाही गोवा भाजपकडून अंतिम रूप दिलं गेल्याची माहिती आहे. केंद्रीय नेतृत्वाशी सल्लामसलत केल्यानंतर मंत्रिमंडळ विस्ताराचा अंतिम निर्णय घेतला जाईल, असं तानावडेंनी स्पष्ट केलं आहे.

गोव्यासह उर्वरित तीन राज्यात भाजपचं सत्तास्थापन खोळंबलं आहे. होळीनंतर विजय मिळालेल्या चारही राज्यात भाजप (BJP) सत्तास्थापनेचा दावा करणार असल्याची माहिती आहे. मात्र गोव्यासारखाच मुख्यमंत्रिपदाचा पेच उर्वरित राज्यांमध्येही झालाय का अशीही चर्चा आता सुरु झाली आहे. गोव्यात 21 मार्चनंतर भाजपचे केंद्रीय निरीक्षक दाखल होणार असून सत्तास्थापनेपासून मुख्यमंत्रिपदापर्यंत सर्व निर्णय केंद्रीय नेतृत्त्वच घेणार असल्याचंही तानावडेंनी स्पष्ट केलं आहे. गोव्यात (Goa) शपथविधीचा सोहळाही भव्य आयोजित केला जाणार असून याला मोठे नेतेही हजर राहणार असल्याचं तानावडेंनी सांगितलं आहे. मगोपच्या पाठिंब्यावर मात्र तानावडेंनी भाष्य करणं टाळलं आहे.