पणजी: काँग्रेसमध्ये पक्षांतराचा इतिहास पुन्हा होणार नाही. कारण ते त्यांच्या पक्षाचे रक्षण उत्तम प्रकारे करत आहेत. तसे पुन्हा घडणार नाही. बहुमत मिळाल्यानंतर आम्ही त्वरित सरकार स्थापनेचा दावा करणार आहोत. आमचे आमदार एकत्र राहतील आणि जाहीरनाम्यात दिलेली सर्व आश्वासने पूर्ण केली जातील असा विश्‍वास काँग्रेसचे वरिष्ठ निरीक्षक पी. चिदंबरम यांनी व्यक्त केला.

पी. चिदंबरम यांनी शनिवारी पणजी येथे पत्रकार परिषद घेतली. यावेळी गोवा प्रभारी दिनेश गुंडू राव आणि वरिष्ठ उपाध्यक्ष एम.के. शाह उपस्थित होते. काँग्रेसने दिलेली सर्व आश्वासने सरकार आल्यावर पूर्ण केली जातील. गोव्यातील जनता काँग्रेसला पूर्ण बहुमत देईल, असा आम्हाला विश्वास आहे. आमचे उमेदवार आश्वासने पूर्ण करतील असे चिदंबरम म्हणाले,

काँग्रेसनेच भाजपला आक्रमकपणे विरोध केला. गोवा हे पंतप्रधान नरेंद्र मोदी यांच्यासाठी निवडणुकीचे ठिकाण बनले आहे. ते गोव्यात निवडणुकीच्या वेळीच येतात. जनतेच्या प्रश्‍नांविषयी त्यांना कोणतीच तळमळ नाही.