पणजी: विधानसभा निवडणुकीसाठीच्या मतमोजणीला अवघे काही तास शिल्लक असून मतमोजणीसाठीची तयारी पूर्ण झाली आहे. स्ट्राँगरूम ते मतमोजणी केंद्रापर्यंत निवडणूक आयोगाने स्वतंत्र टनेल उभारला असून मतमोजणीच्या दिवशी स्ट्रॉँगरूममधून या टनेल मार्फत ईव्हीएम मशीन आणि व्हीव्हीपॅड आणण्यात येतील.

सुरक्षेच्या दृष्टिकोनातून आयोगाने ''थ्री टायर'' सुरक्षा उभारले असून यासाठी सीआयएस आणि राखीव पोलीस दलाचे जवान तैनात करण्यात आले आहेत. यंदा प्रथमच सर्व मतदारसंघाची मतमोजणी एकाच वेळी सकाळी आठ वाजता सुरू होईल. यासाठी 1500 पेक्षा जास्त कर्मचारी कार्यरत असतील अशी माहिती जिल्हाधिकारी अजित रॉय यांनी दिली.

मतमोजणीसाठी आयोगाने यावेळी विशेष तयारी केली आहे. उत्तर गोव्यामध्ये 19 मतदारसंघाची मतमोजणी पणजीच्या आल्तिनो येथील शासकीय तंत्रनिकेतनमध्ये 19 स्वतंत्र कक्षांमध्ये सुरू होईल. तर दक्षिण गोव्यासाठी दामोदर महाविद्यालयामध्ये 21 मतदारसंघाची मतमोजणी सुरू होईल अशी व्यवस्था करण्यात आलेली आहे.

अशी असेल प्रक्रिया

सकाळी 8 वाजता बॅलेट मतमोजणीला सुरवात होईल.8.15 मिनिटांनी स्ट्राँगरूममधून ईव्हीएम मशीन केंद्रावर हलवण्यात येतील.प्रत्यक्ष मतमोजणी 8.30 मिनिटांनी सुरू होईल. मतदारसंघाच्या रचनेवरून 6 ते 11 फेऱ्या होतील.उत्तर गोव्यात सर्वाधिक फेऱ्या पेडणे मतदारसंघात 11 तर सर्वात पणजी मतदारसंघात 6 फेऱ्या होणार आहेत.