मडगाव: दिल्लीच्या लिटिल फ्लॉवर चर्च विद्ध्वंसाबद्दलच्या खोट्या बातम्या पसरवून धार्मिक वैमनस्य निर्माण केल्याबद्दल चर्चिल आलेमाव यांना ताबडतोब अपात्र ठरवण्यासाठी 'आप'ने निवडणूक आयोगाला (Election Commission) पत्र दिले आहे. (TMC AAP Goa)

आम आदमी पार्टीने (AAP) निवडणूक आयोगाला पत्र लिहून तृणमूल काँग्रेसचे बाणावलीचे उमेदवार चर्चिल आलेमाव यांना दिल्लीतील लिटल फ्लॉवर चर्च पाडल्याच्या संबंधात धार्मिक तेढ निर्माण केल्याबद्दल अपात्र ठरवावे व त्यांची उमेदवारी रद्द करावी, अशी तक्रार केली आहे.

फरीदाबादच्या डायोसेशनने या प्रकरणाचे राजकारण केल्याबद्दल चर्चिल आलेमाव यांचा निषेध केल्यानंतर आपने निवडणूक आयोगाला पत्र लिहिले आहे. ‘आप’ने म्हटले आहे, की फरिदाबादच्या डायोसेशनने जारी केलेले प्रसिद्धी पत्रक आणि आपच्या पूर्वीच्या तक्रारीवरून असे सिद्ध होते की, तृणमूल काँग्रेसचे (TMC) बाणावलीचे उमेदवार चर्चिल आलेमाव यांनी आपचे राष्ट्रीय संयोजक अरविंद केजरीवाल आणि आम आदमी पार्टीवर सुनियोजित आरोप केले आहेत.

विशिष्ट समुदायाच्या धार्मिक भावना दुखावत राजकीय समर्थन आणि राजकीय फायदा मिळवण्यासाठी त्यांनी इतरांसोबत षडयंत्र रचल्याचे दिसून येते, जे आचारसंहितेच्या विरोधात आहे आणि मुक्त आणि निष्पक्ष निवडणुकांच्या पावित्र्याशी तडजोड करते, असेही आपने पत्रात म्हटले आहे.

दरम्यान, दिल्ली लिटल फ्लॉवर चर्च पाडल्याबद्दल दिल्ली उच्च न्यायालयात याचिका दाखल करणाऱ्या चर्चिल आलेमाव यांच्या कृत्याचा फरीदाबादच्या डायोसेशनने निषेध केला. प्रत्युत्तर म्हणून फरीदाबादच्या बिशपच्या अधिकाराने शनिवारी एक प्रसिद्धी पत्रक जारी केले की गोव्यातील निवडणुकीच्या अवघ्या दहा दिवस अगोदर या मुद्द्याचे राजकारण करण्यावर प्रश्न उपस्थित होत आहे. निवडणुकीच्या पूर्वसंध्येला अशावेळी चर्च आणि धर्माचा क्षुल्लक राजकीय फायद्यासाठी वापर करण्याचा प्रयत्न असा अर्थ लावला जाऊ शकतो हे लज्जास्पद आहे, असेही नमूद केले आहे.