Texas Shooting: अमेरिकेतील टेक्सासमध्ये शनिवारी एका बंदूकधाऱ्याने गोळ्या झाडून पाच जणांची हत्या केली. मीडिया रिपोर्ट्सनुसार, मृतांमध्ये एका आठ वर्षांच्या मुलाचाही समावेश आहे. टेक्सासमधील क्लीव्हलँडमध्ये ही घटना घडली आहे.

पोलिस (Police) अधिकाऱ्यांनी सांगितले की, बंदूकधारी त्याच्या परिसरात गोळीबार करत होता. झोपायला त्रास होत असल्याने शेजाऱ्याने त्याला तसे करण्यास मनाई केली. त्यामुळे संतप्त झालेल्या बंदूकधाऱ्याने आठ वर्षांच्या मुलासह पाच जणांवर गोळ्या झाडल्या.

सॅन जेसिंटो काउंटीचे शेरिफ ग्रेग केपर्स म्हणाले की, बंदूकधारी त्याच्या परिसरात रायफलने गोळीबार करत होता. लहान मूल झोपण्याचा प्रयत्न करत असल्याने शेजाऱ्याने त्याला गोळीबार थांबवण्यास सांगितले.

केपर्स पुढे म्हणाले की, बंदूकधाऱ्याने नंतर शेजाऱ्यांवर गोळीबार केला. घटनेच्या वेळी बंदूकधारी मद्यधुंद अवस्थेत होता. अधिकाऱ्याने सांगितले की, संशयित पीडितांच्या घरी रायफल घेऊन जात असताना सीसीटीव्ही कॅमेऱ्यात कैद झाला आहे.

दुसरीकडे, अमेरिकेत गोळीबाराच्या घटना अगदी सामान्य झाल्या आहेत. गन वायलेन्स आर्काइव्हनुसार, देशात आतापर्यंत किमान 174 सामूहिक गोळीबाराच्या घटना घडल्या आहेत.

चार जणांच्या हत्येप्रकरणी 240 वर्षांची शिक्षा

दरम्यान, अमेरिकेतील (America) इंडियानापोलिस येथे गोळीबार करुन चार जणांची हत्या केल्याप्रकरणी दोषी ठरलेल्या एका व्यक्तीला 240 वर्षांच्या तुरुंगवासाची शिक्षा सुनावण्यात आली आहे. मार्सेल विल्स (20), ब्रॅक्सटन फोर्ड (21), जालेन रॉबर्ट्स आणि एक तरुणी किमारी हंट (21) या तीन तरुणांचा फेब्रुवारी 2020 मध्ये झालेल्या गोळीबारात मृत्यू झाला होता.