US Airstrike on IRGC Headquarters Tehran: मध्यपूर्वेतील युद्ध आता एका अत्यंत विनाशकारी वळणावर पोहोचले आहे. अमेरिकेने इराणला मोठा दणका देत तेहरानमधील 'इस्लामिक रिव्होल्यूशनरी गार्ड कॉर्प्स'च्या एका अतिशय सुरक्षित आणि गुप्त भूमिगत मुख्यालयावर जबरदस्त हवाई हल्ला केला. या हल्ल्यात अमेरिकेने आपल्या ताफ्यातील सर्वात प्रगत 'बंकर-बस्टर' बॉम्बचा वापर केला असून यामुळे जमिनीच्या शेकडो फूट खाली असलेले इराणचे लष्करी तळ पूर्णपणे उद्ध्वस्त झाल्याचे वृत्त आहे. अमेरिकेच्या या आक्रमक पवित्र्यामुळे इराणमध्ये मोठी खळबळ उडाली.

हे थरारक ऑपरेशन अमेरिकन सेंट्रल कमांडचे प्रमुख ॲडमिरल ब्रॅड कूपर यांच्या आदेशावरुन पार पडले. विशेष म्हणजे, यासाठी अमेरिकेने आपल्या अत्यंत घातक अशा 'B-2 स्टेल्थ बॉम्बर्स'चा वापर केला. या विमानांनी लांब पल्ल्याचा प्रवास करुन थेट तेहरानमधील IRGC च्या त्या गुप्त ठिकाणाला लक्ष्य केले, जिथे वरिष्ठ लष्करी कमांडर महत्त्वाची बैठक घेत होते. अहवालांनुसार, अमेरिकेने (America) येथे 'डबल स्ट्राईक' रणनीतीचा वापर केला. पहिल्या हल्ल्यानंतर जेव्हा मदत आणि बचाव कार्य सुरु झाले, तेव्हाच दुसरा भीषण स्फोट घडवून आणण्यात आला. यामुळे अनेक इराणी कमांडर आणि बचाव पथकातील कर्मचारी मारले गेल्याची भीती व्यक्त केली जात आहे.

इराणने आपले अणूप्रकल्प आणि लष्करी तळ हवाई हल्ल्यांपासून वाचवण्यासाठी जमिनीखाली मोठ्या बंकरमध्ये हलवले होते. मात्र, अमेरिकेच्या बंकर-बस्टर बॉम्बने हे सुरक्षा कवच भेदले. राष्ट्राध्यक्ष डोनाल्ड ट्रम्प यांनी इराणला दिलेल्या कडक इशाऱ्यानंतर हा हल्ला झाला आहे. ट्रम्प यांनी धमकी दिली होती की, जर इराणने (Iran) आपल्या कारवाया थांबवल्या नाहीत, तर त्यांना एका रात्रीत संपवले जाईल. त्यांनी होर्मुजची सामुद्रधुनी खुली करण्यासाठी बुधवारपर्यंतचा अल्टिमेटम दिला होता, परंतु ही मुदत संपण्यापूर्वीच अमेरिकेने इराणवर हा मोठा हल्ला चढवून आपले इरादे स्पष्ट केले आहेत.

अमेरिकेचे युद्ध सचिव पीट हेगसेथ यांनी मंगळवारी स्पष्ट केले की, इराणवर सुरु असलेले हे हल्ले केवळ सुरुवात आहे. येत्या काही दिवसांत हे हल्ले अधिक भयावह आणि विनाशकारी होऊ शकतात. अमेरिकेने इराणची ऊर्जा केंद्रे, गॅस आणि पाणीपुरवठा यंत्रणाही उद्ध्वस्त करण्याची तयारी केली आहे. या कारवाईमुळे इराणच्या लष्करी शक्तीला मोठा तडा बसला असून संपूर्ण मध्यपूर्वेत युद्धाचा भडका उडण्याची शक्यता निर्माण झाली आहे. आता इराण यावर काय प्रतिक्रिया देतो, याकडे जगाचे लक्ष लागले आहे.