मॉस्को: युक्रेनने शनिवारी रात्री रशियाच्या सोचीजवळील तेल साठवणूक केंद्रावर ड्रोनने हल्ला केला. या हल्ल्यानंतर तेलकेंद्रावर मोठी आग भडकली. त्यानंतर रशिया आणि युक्रेनमध्ये दोन्ही बाजूंनी एकमेकांवर हल्ले करण्यात आले.

‘‘ड्रोनचा मोठा अवशेष इंधनाच्या टाकीवर आपटल्यामुळे लागलेली आग आटोक्यात आणण्यासाठी १२० हून अधिक अग्निशमन दलाचे कर्मचारी प्रयत्न करीत होते,’’ असे क्रास्नोदर प्रांताचे गव्हर्नर वेनियामिन कोंद्रात्येव यांनी सांगितले. सोशल मीडियावर ‘व्हायरल’ झालेल्या व्हिडिओमध्ये तेलकेंद्राच्या वरच्या भागात धुराचे मोठे लोट दिसत होते. या घटनेनंतर सोची विमानतळावरील वाहतूक थांबविण्यात आली होती.

व्होरोनेझ भागातील अधिकाऱ्यांनी सांगितले की आणखी एका युक्रेनच्या ड्रोन हल्ल्यात चार जण जखमी झाले. रशियाच्या संरक्षण मंत्रालयाच्या दाव्यानुसार, रशियाच्या हद्दीतील काळ्या समुद्राच्या दिशेने युक्रेनने केलेले ९३ ड्रोन हल्ले रविवारी रात्रीच्या सुमारास रशियन हवाई संरक्षण यंत्रणांनी निष्क्रिय केले.

गेल्या काही आठवड्यापासून युक्रेन आणि रशियामधील संघर्ष तीव्र होत चालला आहे. गेल्या आठवड्यात गुरुवारी रशियन ड्रोन आणि क्षेपणास्त्र हल्ल्यात ३१ जणांचा मृत्यू झाला होता, त्यामध्ये पाच मुलांचाही समावेश होता; तसेच १५० हून अधिक लोक जखमी झाले होते. नागरी वस्त्यांवर रशियाकडून हल्ले केले जात असून, गेल्या आठवड्यात एका रुग्णालयालाही रशियाने लक्ष्य केले होते.

७६ ड्रोनच्या साह्याने हल्ला

युक्रेनमधील मायकोलायिव शहरात रशियाच्या क्षेपणास्त्रांनी एका निवासी भागाला लक्ष्य केले. या हल्ल्यामध्ये सात जण जखमी झाल्याचे युक्रेनच्या अधिकाऱ्यांनी सांगितले. युक्रेनच्या हवाई दलाने रविवारी सांगितले की, रशियाने युक्रेनवर ७६ ड्रोन आणि ७ क्षेपणास्त्रे डागली. त्यापैकी ६० ड्रोन व एक क्षेपणास्त्र पाडण्यात आले; परंतु उर्वरित १६ ड्रोन आणि ६ क्षेपणास्त्रांद्वारा आठ वेगवेगळ्या ठिकाणी हल्ले करण्या आले.