कामाचे तास कमी झाल्याचे कुणाला आवडणार नाही, आणि एखाद्या देश त्यासाठी पुढाकार घेत असेल तर, आणखीनच चांगली बाब आहे. एका देशात आठवड्यातील कामाचे तास 45 वरून 40 पर्यंत कमी करण्याबाबत प्रयत्न सुरू आहेत. यासंबधीचे एक विधेयक त्यांनी मांडले आहे. चिलीचे (Chile) अध्यक्ष गॅब्रिएल बोरिक (Gabriel Boric) यांच्या सरकारने मंगळवारी (दि.23) याबाबत माहिती दिली. गॅब्रिएल त्यांचे निवडणूक आश्वासन पूर्ण करण्यासाठी प्रयत्नशील आहेत.

चिलीचे अध्यक्ष गॅब्रिएल बोरिक यांनी दिलेल्या माहितीनुसार, हे विधेयक मंजूर झाले तर पुढील पाच वर्षांत या देशात आठवड्यातील कामाचे तास 45 वरून 40 पर्यंत कमी होतील. हे विधेयक 2017 मध्ये चिलीच्या संसदेत सादर करण्यात आले आणि तेव्हापासून ते लटकले आहे. बोरिक यांनी या विधेयकाचे वर्णन 'तातडीचे' असे केले आहे. यानंतर, चिलीच्या घटनेनुसार, कायद्याच्या निर्मात्यांना शक्य तितक्या लवकर त्यावर काम करावे लागणार आहे.

चिलीचे सर्व खासदार बोरिक सरकारने विधेयकात केलेल्या अनेक बदलांवर चर्चा करतील. यामध्ये विशिष्ट श्रेणींमध्ये कामाचे तास कमी करण्यासाठी वेळ मर्यादा वाढवणे अशा गोष्टींचा समावेश आहे. यामध्ये सार्वजनिक वाहतूक चालक आणि घरगुती कामगार यांचाही समावेश आहे. बोरिक यांनी मंगळवारी राष्ट्रपती भवनात एका समारंभात सांगितले की, "या सुधारणा आवश्यक आहेत जेणेकरून, एक नवीन चिली तयार करू शकू जे अधिक न्याय्य असेल."