Turkey-Syria Earthquake Today: तुर्कस्तानच्या अडचणी कमी होण्याचं नाव घेत नाहीत. 24 तासांत तिसऱ्यांदा तुर्कस्तान हादरले आहे. यावेळी भूकंपाची तीव्रता रिश्टर स्केलवर 6 इतकी नोंदवली गेली. USGS ने याबाबत माहिती दिली आहे. सोमवारी सकाळी आलेल्या जोरदार भूकंपामुळे तुर्कस्तानचे मोठे नुकसान झाले. तिथे संध्याकाळी पुन्हा भूकंप झाला. आत्तापर्यंत सुमारे 1000 लोकांना आपला जीव गमवावा लागला आहे.

दरम्यान, तुर्कस्तानमध्ये सोमवारी सकाळी जोरदार भूकंप झाला. भूकंपामुळे अनेक इमारती कोसळल्या. आफ्टरशॉक अजूनही जाणवत आहेत. विविध शहरांतील बचाव कर्मचारी आणि रहिवासी कोसळलेल्या इमारतींमधून वाचलेल्यांना बाहेर काढण्याचा प्रयत्न करत आहेत. भूकंपात उद्ध्वस्त झालेल्या रुग्णालयातून आणि सीरियातील इतर अनेक रुग्णालयांमधून (Hospital) नवजात बालकांसह रुग्णांना बाहेर काढावे लागले.

दुसरीकडे, अडाना शहरातील एका रहिवाशाने सांगितले की, आमच्या आजूबाजूच्या तीन इमारती कोसळल्या आहेत. दियारबाकीर या सुदूर पूर्वेकडील शहरात, बचाव कर्मचारी भूकंपामुळे कोसळलेल्या इमारतीतून वाचलेल्यांना स्ट्रेचरवर घेऊन जात आहेत. कैरोपर्यंत भूकंपाचे धक्के जाणवले आहेत. त्याचा केंद्रबिंदू सीरियाच्या (Syria) सीमेपासून 90 किमी अंतरावर असलेल्या गाझियानटेप शहराच्या उत्तरेला होता.

तसेच, भूकंप सीरियाच्या एका भागात झाला जिथे एक दशकाहून अधिक काळ गृहयुद्ध सुरु आहे. प्रभावित क्षेत्र सरकार आणि बंडखोरांमध्ये विभागले गेले आहे. त्याचवेळी, तुर्की प्रदेशातील संघर्षामुळे लाखो निर्वासित स्थायिक झाले आहेत. लढाईमुळे विस्थापित झालेले चार दशलक्ष लोक विरोधी-नियंत्रित सीरियन प्रदेशात राहत आहेत.