ब्रिटनची राजधानी लंडन (Britain, London) येथून एक अजब गजब चोरीची बातमी समोर आली आहे. ब्रिटनची राजधानी लंडन येथून करोडो रूपयांची बेंटले कार (Bentley Car) चोरून पाकिस्तानला (Pakistan) पळवली आहे. या चोरीच्या घटनेत ब्रिटनमध्ये असलेल्या एका वरिष्ठ पाकिस्तानी अधिकाऱ्याचा देखील सहभाग असल्याची माहिती समोर आली आहे. 'बेंटले मुल्सेन' ही जगप्रसिद्ध सुपरकार आहे. ज्याची किंमत 02 कोटी 40 लाख एवढी आहे.

पाकिस्तानच्या कस्टम अधिकार्‍यांनी शनिवारी छापा टाकून कराचीतील एका बंगल्यातून ब्रिटनमधून चोरलेली 'बेंटले मुल्सेन' सेडान ही आलिशान कार जप्त केली. ब्रिटनच्या नॅशनल क्राईम एजन्सीने कार चोरीला गेल्याची माहिती दिल्यानंतर अधिकाऱ्यांनी बंगल्यावर छापा टाकून तेथून ही महागडी कार जप्त केली. दुसऱ्या एका बंगल्यातून विना परवाना शस्त्रे जप्त करण्यात आली आहेत.

काही आठवड्यांपूर्वी लंडनमध्ये ही कार चोरीला गेल्याची माहिती समोर आली. या टोळीत सामील असलेल्या चोरांनी पूर्व युरोपीय देशातील एका उच्चपदस्थ राजनयिकाच्या कागदपत्रांचा वापर करून कार पाकिस्तानात आणली होती. या अधिकाऱ्याला आता त्यांच्या सरकारने माघारी बोलावले असल्याचे सांगण्यात आले आहे.