Israeli Airstrike: एकीकडे इस्रायल आणि हमास यांच्यात युद्ध सुरु असतानाच दुसरीकडे सोमवारी पहाटे सीरियातील अलेप्पो शहरावर इस्रायलकडून भीषण हवाई हल्ले करण्यात आले. इस्रायलने केलेल्या या हवाई हल्ल्यांमध्ये अनेक लोक मारले गेले आहेत.

सीरियाच्या सरकारी माध्यमांनी हा दावा केला आहे. सरकारी वृत्तसंस्था 'साना'ने सांगितले की, हे हल्ले अलेप्पोच्या दक्षिण-पूर्व भागात झाले. मात्र, त्यांनी मृतांचा आकडा उघड केला नाही. एजन्सीने सांगितले की, "या हल्ल्यात मोठ्या प्रमाणावर जीवित आणि मालमत्तेचे नुकसान झाले आहे."

इस्रायलने हल्ले तीव्र केले

दरम्यान, 2011 पासून इस्त्रायली सैन्याने सीरियामध्ये अनेक हल्ले केले आहेत. या हल्ल्यांमध्ये लष्कराच्या चौक्या आणि इराण (Iran) समर्थित सैनिकांना विशेषतः लक्ष्य करण्यात आले आहे. गेल्या वर्षी 7 ऑक्टोबर रोजी हमासच्या दहशतवाद्यांनी इस्रायलवर हल्ला केला, त्यानंतर इस्त्रायलकडून हल्ले सुरु झाले जे आजतागायत सुरु आहेत.

इराणच्या दूतावासाजवळ हवाई हल्ला झाला

दुसरीकडे, 1 एप्रिल रोजी इस्रायलने सीरियाची (Syria) राजधानी दमास्कस येथील इराणी दूतावासाजवळ हवाई हल्ला केला होता. या हल्ल्यात 11 जणांचा मृत्यू झाला होता. हा हल्ला इतका भीषण होता की, एक इमारत पूर्णपणे उद्ध्वस्त झाली होती. या हल्ल्यात इराणच्या कुड्स फोर्सचे दोन टॉप कमांडर आणि इतर 5 अधिकारीही मारले गेले होते.

मृतांमध्ये इराणचे सीरियातील सर्वात वरिष्ठ अधिकारी मोहम्मद रजा जाहेदी आणि त्यांचा डेप्युटी कमांडर मोहम्मद हज रहीमी यांचा समावेश होता.

दरम्यान, तुर्कीयेनेही उत्तर सीरियामध्ये ड्रोन हल्ला केला. तुर्कीयेने शुक्रवारी संध्याकाळी हा हल्ला केला. या ड्रोन हल्ल्यात अमेरिका समर्थित चार सैनिक ठार झाले. तर 11 नागरिक जखमी झाले. जखमींना रुग्णालयात दाखल करण्यात आले आहे.