Sri Lanka Economic Crisis: श्रीलंकेचे राष्ट्रपती गोटाबाया राजपक्षे यांनी पलायन केल्याने देशात आणीबाणी जाहीर करण्यात आली आहे. श्रीलंकेच्या राष्ट्रपतींनी काही दिवसांपूर्वी 13 जुलै रोजी आपल्या पदाचा राजीनामा देणार असल्याची घोषणा केली होती. मात्र, ते देशातून पळून गेल्यानंतर आता त्यांच्या राजीनाम्याबाबत प्रश्न उपस्थित केले जात आहेत. यातच आता पंतप्रधान रानिल विक्रमसिंघे देशाचे काळजीवाहू राष्ट्रपती बनले.

दुसरीकडे, राष्ट्रपती पळून गेल्यापासून कोलंबोतील (Colombo) पंतप्रधानांच्या निवासस्थानाबाहेर सार्वजनिक निदर्शने सुरु झाली आहेत. संतप्त आंदोलक सरकारविरोधात (Government) घोषणाबाजी करताना दिसत आहेत. जमावाने रस्त्यावर गोंधळ घालण्यास सुरुवात केली आहे. निदर्शनांच्या पार्श्वभूमीवर पंतप्रधान निवासस्थानाबाहेर मोठ्या प्रमाणात लष्करी जवान तैनात करण्यात आले आहेत. संतप्त जमावाला पांगवण्यासाठी त्यांच्यावर अश्रुधुराच्या नळकांड्या फोडण्यात आल्या.

पत्नीसह मालदीवमध्ये पोहोचल्याची चर्चा

मीडिया रिपोर्ट्सनुसार, गोटाबाया राजपक्षे (Gotabaya Rajapaksa) पत्नी, बॉडिगार्ड आणि पायलटसह मालदीवमध्ये पोहोचले आहेत. श्रीलंकेतून पळून जाण्यासाठी त्यांनी हवाई दलाच्या विमान AN-32 चा वापर केल्याचे सांगितले जात आहे. यापूर्वी ते श्रीलंकेत (Sri Lanka) लपून राहत होते. गोटाबाया राजपक्षे यांच्या राजीनाम्यानंतर देशातील राष्ट्रपतींची कमान आता संसदेचे अध्यक्ष महिंदा यापा अभयवर्धन यांच्या हाती येणार आहे.