Spain Train Accident Toledo High Speed Collision: स्पेनमधून भीषण रेल्वे अपघाताची घटना समोर आली. बुधवारी (28 ऑक्टोबर) सकाळी दोन हाय-स्पीड ट्रेनमध्ये झालेल्या जोरदार धडकेत 46 प्रवाशांचा मृत्यू झाला. हा अपघात इतका भीषण होता की, ट्रेनच्या अनेक बोगी चक्काचूर झाल्या. मिळालेल्या माहितीनुसार, हा अपघात टोलेडो प्रांतातील लॉस येबेनेस आणि उर्दा शहरांच्या दरम्यान झाला.

स्थानिक वेळेनुसार सकाळी सुमारे 9 वाजण्याच्या सुमारास दोन्ही हाय-स्पीड ट्रेन एकमेकांवर आदळल्या. अपघाताच्या (Accident) सुरुवातीला 10 आणि नंतर 39 जणांच्या मृत्यूची माहिती समोर येत होती, परंतु नंतर हा आकडा वाढून 46 वर पोहोचल्याची पुष्टी झाली. या घटनेत अनेक प्रवासी गंभीर जखमी झाले असून त्यांच्यावर उपचार सुरु आहेत.

स्पेनच्या सरकारी रेल्वे नेटवर्क ऑपरेटर 'अदिफ'ने या दुर्घटनेला दुजोरा दिला. सोशल मीडियावरुन माहिती देताना त्यांनी सांगितले की, या धडकेमुळे राजधानी माद्रिदला दक्षिण अंदालुसिया क्षेत्राशी जोडणाऱ्या प्रमुख हाय-स्पीड रेल्वे मार्गावरील वाहतूक पूर्णपणे ठप्प झाली. दुर्घटनेची माहिती मिळताच रेल्वे प्रशासनाची बचाव पथके तातडीने घटनास्थळी दाखल झाली असून मदत कार्य युद्धपातळीवर सुरु आहे. ट्रॅकवरील बोगी बाजूला करण्याचे काम वेगाने सुरु असून प्रवाशांच्या सुरक्षेसाठी या मार्गावरील इतर सर्व ट्रेन्स तात्पुरत्या थांबवण्यात आल्या आहेत. तसेच, या अपघाताचे नेमके तांत्रिक कारण शोधण्यासाठी सखोल तपास सुरु करण्यात आला.

स्पेनचे पंतप्रधान पेड्रो सांचेझ यांनी या दुर्घटनेबद्दल दुःख व्यक्त केले. त्यांनी सोशल मीडियावर लिहिले की, "टोलेडोमधील या गंभीर रेल्वे अपघाताने मला प्रचंड धक्का बसला. घटनास्थळी बाधित लोकांना सर्वतोपरी मदत केली जात आहे." पंतप्रधान वाहतूक मंत्री आणि प्रांतीय प्रशासनाशी सतत संपर्कात आहेत. दरम्यान, स्पेनमध्ये रेल्वे अपघातांची मालिका यापूर्वीही पाहायला मिळाली. या वर्षाच्या सुरुवातीला जानेवारीमध्ये दक्षिण स्पेनमध्ये ट्रेन रुळावरुन घसरुन समोरुन येणाऱ्या दुसऱ्या ट्रेनला धडकली होती, ज्यामध्ये 45 जणांचा मृत्यू झाला होता. 2013च्या भीषण अपघातानंतरचा हा स्पेनमधील सर्वात मोठा रेल्वे अपघात मानला जात आहे.