Russia-Ukraine War: गेल्या दहा महिन्यांपासून सुरू असलेल्या रशिया-युक्रेन युद्धाचा शेवट काही दिसून येत नाही. इतर देशांच्या मदतीमुळे युक्रेन चिवटपणे रशियाविरोधात लढा देत आहे. तथापि, रशियाचे राष्ट्राध्यक्ष व्लादिमीर पुतिन यांच्या एका निकटवर्तियाने नुकतेच एक गंभीर वक्तव्य केले आहे. हे युद्ध एकतर रशिया जिंकेल, नाही जिंकले तर जग नष्ट होईल, असा दावा या पुतिन यांच्या निकटवर्तियाने केला आहे.

(Alexander Dugin On War)

पुतिन यांचा ब्रेन मानल्या जात असलेले अलेक्झांडर दुगिन यांनी हे वक्तव्य केले आहे. भारतीय खासगी न्यूज चॅनेल TV 9 भारतवर्षला दिलेल्या विशेष मुलाखतीत त्यांनी ही माहिती दिली आहे. दुगिन म्हणाले की, "या युद्धाबाबत दोनच शक्यता आहेत. पहिली शक्यता म्हणजे जेव्हा आम्ही जिंकू तेव्हा युद्ध संपेल. जरी हे युद्ध फार सोपे नसले तरी. आणि दुसरी शक्यता अशी आहे की जर रशिया जिंकणार नसेल तर ही लढाई जगाच्या अंतासह संपेल. एकतर आम्ही जिंकू, किंवा जगाचा नाश होईल."

दुगिन म्हणाले, मला खात्री आहे की रशिया कोणत्याही परिस्थितीत शत्रूकडून पराभव स्वीकारणार नाही. युद्धाच्या शेवटी विजयाशिवाय दुसरा कोणताही पर्याय आम्ही सहन करणार नाही आणि यासाठी आमचे सर्व नागरिक, आमचा देश, आमचे राष्ट्राध्यक्ष यांची पुर्ण सहमती आहे.

या युद्धकाळात काही दिवसांपुर्वी एका कार बॉम्बस्फोटात दुगिन यांच्या मुलीचा मृत्यू झाला होता. हा स्फोट दुगिन यांना मारण्यासाठी घडवून आणण्यात आला होता, असे समजते. या स्फोटामागे युक्रेनियन दहशतवाद्यांचा हात असल्याचे बोलले जात आहे. जर दहशतवाद्यांना मुलीऐवजी मला मारायचे असते तर मला दोनदा मरायला आवडले असते, असेही दुगिन म्हणाले होते.

ते म्हणाले की, हे युद्ध रशिया आणि युक्रेनमध्ये नाही. हे दोन देशांमधील किंवा रशिया आणि पश्चिमात्य देश यांच्यातील लढ्याबद्दल नाही. हा संघर्ष मनुष्य आणि वाईट ताकद यांच्यात आहे. माझा माझ्या देशाला, माझ्या राष्ट्राध्यक्षांना पाठिंबा आहे.