रशिया आणि युक्रेन यांच्यातील युद्ध अजूनही सुरुच आहे. आता आपण मागे हटणार नसल्याचे पुतिन यांनी आपले इरादे स्पष्ट करत सांगितले आहे. पण दिर्घकाळ चाललेल्या युद्धामुळे रशियाला मोठ्या समस्यांचा सामना करावा लागत आहे.

रशियाला सध्या सैन्यांची कमतरता भासत आहे. याचाच विचार करुन पुतिन यांनी आता रशियन नागरिकत्व मिळवणे सोपे केले आहे.

दरम्यान, पुतिन यांनी युक्रेनमध्ये लढण्यासाठी सुमारे 10,000 नॅचुरलाइज्ड सिटिजन्सना पाठवल्याची माहिती समोर आली आहे. ज्या लोकांना परदेशी नागरिकत्व दिले जाते त्यांना नॅचुरलाइज्ड सिटिजन्स म्हटले जाते. खुद्द रशियाच्या वरिष्ठ अधिकाऱ्याने ही माहिती दिली आहे.

दरम्यान, काही नागरिकांनी (Citizens) युद्धात भाग घेण्याऐवजी देश सोडणे पसंत केले आहे, असेही रशियन अधिकाऱ्याने सांगितले. लष्करी हल्ल्यासाठी सैनिकांची संख्या वाढवण्यासाठी मॉस्को मध्य आशियाई स्थलांतरितांना सैन्यात भरती होण्यास भाग पाडत असल्याचा आरोप आहे. त्यामुळे हे सर्व स्थलांतरित युक्रेनविरुद्धच्या युद्धात भाग घेऊ शकतील.

रशियन अधिकारी काय म्हणाले?

रशियाच्या तपास समितीचे प्रमुख अलेक्झांडर बॅस्ट्रीकिन यांनी सांगितले की, रशिया रशियन नागरिकत्व मिळवलेल्या स्थलांतरितांवर रशिया दबाव टाकत आहे. परंतु या सर्व नागरिकांनी लष्करी अधिकाऱ्यांकडे नोंदणी केलेली नाही.

बॅस्ट्रीकिन पुढे म्हणाले की, आम्ही रशियन नागरिकत्व घेतलेल्या 30,000 हून अधिक लोकांना अटक केली आहे. पण या लोकांना लष्करी सेवेसाठी नोंदणी करायची नव्हती. मात्र, त्यांचा यादीत समावेश करण्यात आला आहे. बॅस्ट्रीकिन पुढे असेही म्हणाले की, "विशेष लष्करी कारवाईचा भाग म्हणून सुमारे 10,000 लोकांना आधीच युक्रेनमध्ये पाठवण्यात आले आहे.''

मध्य आशियातील बहुतेक लोक

लाखो स्थलांतरित इतर देशांतून काम करण्यासाठी रशियात येतात, त्यापैकी बहुतेक मध्य आशियातील आहेत. रशियाने (Russia) अलिकडच्या वर्षांत त्यांच्यासाठी रशियन नागरिकत्व मिळवणे सोपे केले आहे. मात्र रशियातील या स्थलांतरितांपुढे मोठे आव्हान आहे. रशियामधील स्थलांतरितांना लष्करी अधिकाऱ्यांकडे नोंदणी करण्यास भाग पाडले जाते. यामुळे लोक हळूहळू रशियाचे नागरिकत्व सोडत आहेत, असेही बॅस्ट्रिकिन यांनी पुढे सांगितले.