जपानच्या विद्यापीठात करण्यात आलेल्या एका अभ्यासातून धक्कादायक माहिती समोर आली आहे. जपानमध्ये प्रसिद्ध असलेले नूडल्स (रामेन) खाल्याने अकाली मृत्यूचा धोका अधिक वाढू शकतो. रामेनचे सेवन अधिक प्रमाणात करणाऱ्यांचा अकाली मृत्यू होऊ शकतो असे या अभ्यासातून निष्कर्ष काढण्यात आला आहे.

जपानमधील विविध विद्यापीठांनी एकत्र येत रामेनच्या सेवन आणि त्याचे आरोग्यावर होणारे दुष्परिणाम याचा संयुक्त अभ्यास करण्यात आला आहे. यामागाटा भागात प्रामुख्याने रामेनचे सेवन अधिक प्रमाणात करण्यात येते, त्यामुळे याच भागातील लोकांवर हा अभ्यास करण्यात आला. रामेनचे अधिक सेवन करणाऱ्या लोकांना अकाली मृत्यूचा धोका दीडपट असल्याचे यात अढळून आले तर, कमी प्रमाणात रामेन खाणाऱ्यांना अकाली मृत्यूचा धोका कमी असल्याचे अभ्यासात आढळून आले आहे.

यामागाटा प्रेफेक्चर या भागातील ४० वर्षे आणि त्यावरील वय असणाऱ्या ६,७२५ स्थानिकांवर प्रयोग करण्यात आला. सुमारे चार वर्षे हा अभ्यास सुरु होता. यात कोण किती प्रमाणात रामेन खाते यावरुन त्यांचे गट करण्यात आले होते. आठवड्यातून एकदा, दोनदा, तीनवेळा किंवा त्यापेक्षा अधिक अशा पद्धतीने त्यांची वर्गवारी करण्यात आली होती.

अभ्यासातून काय समोर आले?

आठवड्यातून तीनवेळा किंवा त्यापेक्षा अधिकवेळा रामेन खाणाऱ्या लोकांमध्ये अकाली मृत्यूचा धोका १.५२ टक्क्यांनी वाढल्याचे दिसून आले. तर, एक किंवा दोनवेळा रामेन खाणाऱ्यांमध्ये अकाली मृत्यूचा धोका कमी असल्याचे अभ्यासात दिसून आले. धक्कादायक बाब म्हणजे त्यापेक्षा अधिक प्रमाणात सेवन असणाऱ्या लोकांना अकाली मृत्यूचा धोकाही अधिक असल्याचे दिसून आले.

वयाच्या सत्तरीत असणाऱ्या लोकांना याचा अधिक फटका बसल्याचे दिसून येते. तसेच, रामेनसोबत मद्याचे सेवन करणाऱ्यांची धोक्याची पातळी अधिक वाढते. हा दर तीनपट असल्याचे अभ्यासात म्हटले आहे.

दरम्यान, रामेन एकदा किंवा दोनदा खाल्याने आरोग्यावर तेवढा दुष्परिणाम होत नाही, असे अभ्यासात म्हटले आहे. न्यट्रिशन जर्नलमध्ये हा अभ्यास प्रकाशित करण्यात आला आहे.

रामेनमध्ये मीठाचा अधिक प्रमाणात वापर केला जातो. यामुळे शरिरातील सोडियमचे प्रमाण वाढते. यामुळे उच्च रक्तदाब, तीव्र झटका किंवा पोटाचा कर्करोग देखील होण्याचा धोका वाढतो. जपानमध्ये नूडल्स (रामेन) खाण्याचे प्रमाण अधिक आहे, शिवाय यात लोकांना पूर्वव्याधी असतील तर ते अधिक धोकादायक ठरू शकते.

अभ्यासकांनी मीठाचे सेवन कमी करण्याचा सल्ला देत हिरव्या भाज्या अधिक खाण्याचा सल्ला दिला आहे. दरम्यान, रामेन खाण्यामुळे मृत्यूचा धोका वाढतो असा निष्कर्ष काढणे घाईचे होईल, असेही अभ्यासकांनी म्हटले आहे. याला तुमची जीवनशैली देखील कारणीभूत ठरु शकते. तसेच, काही गंभीर आजार असलेल्यांनी रामेन खाण्याचे टाळावे, असेही अभ्यासकांनी सुचवले आहे.

नूडल्स (रामेन) धोकादायक आहेत असा सरसकट निष्कर्ष योग्य ठरणार नाही. पण, तुम्ही आराहाराकडे योग्य लक्ष देणे गरजेचे आहे. त्याशिवाय व्यायाम नसेल, अतिप्रमाणात खाणे, मसालेदार, तेलकट पदार्थ खाणे यामुळे रामेनचा धोका वाढतो, असे अभ्यासकांनी म्हटले आहे.