काठमांडू: नेपाळमध्ये दोन दिवसांच्या हिंसक आंदोलनानंतर तणावपूर्ण वातावरण होते. देशाचे पंतप्रधान आणि अध्यक्षांनी राजीनामा दिल्यानंतर मंगळवारी (ता. ९) रात्रीपासूनच सैन्यदलाने अंतर्गत सुरक्षा आपल्या हाती घेत देशभर निर्बंध लागू केल्यामुळे आज कोठेही निदर्शने झाली नाहीत. सैन्याने आज संध्याकाळनंतर देशभर संचारबंदी लागू करत आंदोलन पुन्हा न भडकण्याची खबरदारी घेतली.

समाज माध्यमांवरील बंदीच्या निषेधार्थ निदर्शने करत नेपाळमधील युवकांनी सरकार भ्रष्ट असल्याचा आरोप करत पंतप्रधानांच्या राजीनाम्याची मागणी केली होती. त्यांनी सोमवार आणि मंगळवार असे दोन दिवस सरकारविरोधात प्रचंड मोठे आंदोलन करत सरकारी इमारतींवर हल्ले केले होते.

संसदेसह मंत्र्यांची व नेत्यांची घरेही त्यांनी जाळली. अराजकतेची ही स्थिती हाताबाहेर गेल्याने देशाचे पंतप्रधान के. पी. शर्मा ओली आणि अध्यक्ष रामचंद्र पौडेल यांनी राजीनामा दिल्याने सरकार कोसळले आहे.

नेपाळमधील सरकारविरोधी असंतोषानंतर आता फ्रान्समधील सत्ताधाऱ्यांविरोधात रोष वाढत असल्याचे चित्र आहे. फ्रान्सचे अध्यक्ष इमॅन्यूएल मॅक्रॉन यांच्याविरोधात आंदोलकांनी बुधवारी (ता. १०) पॅरिससह देशव्यापी आंदोलन केले. आंदोलकांनी अनेक ठिकाणी रस्ते अडवले, आगी लावल्या. जमावाला पांगवण्यासाठी पोलिसांनी अश्रुधुराच्या नळकांड्यांचा वापर केला.

दिवसभरात काय घडलं?

प्रमुख शहरांमध्ये सैनिक तैनात

काठमांडूसह प्रमुख शहरांत शुकशुकाट

दिल्लीत नेपाळ दूतावासाबाहेरील सुरक्षा वाढविली

संघर्षातील मृतांची संख्या २५ वर

जाळपोळ करणाऱ्या २७ जणांना अटक, शस्त्रे जप्त

नेपाळमधील स्थितीबाबत संयुक्त राष्ट्रांकडून चिंता