इजिप्त (Egypt) देशातून एक धक्कादायक घटना समोर आली आहे. होणारी बायको तिने दिलेल्या परीक्षेत नापास होण्याची शक्यता असल्याने तिच्या होणाऱ्या पतीने चक्क शाळाच पेटवून दिली. विशेष म्हणजे हा तरूण अवघ्या 21 वर्षांचा आहे. या तरूणाचा काही दिवसांपूर्वी त्या तरूणी सोबत साखरपुडा झाला आहे. दरम्यान, पोलिसांनी या तरूणाला अटक केली आहे.

पोलिसांनी तरूणाला ताब्यात घेऊन त्याला तुरूंगात डांबण्यात आले आहे. प्रकरणाचा अधिक तपास पोलिस करत आहेत. तरूण शाळेला आग लावल्यानंतर त्याठिकाणाहून फरार झाला होता. पोलिसांनी त्याला मेनोफिया प्रांतातून अटक केली. शाळा परिसरात कोणतीही जिवीतहानी झाली नसल्याचे पोलिसांनी म्हटले आहे.

या तरूणाला पोलिसांनी अटक केल्यानंतर त्याची चौकशी करण्यात आली. त्यावेळी त्याने असे सांगितले की, त्याची होणारी बायको परीक्षेत नापास झाली तर, तिला आणखी एक वर्ष परीक्षा द्यावी लागेल, त्यामुळे त्यांचे लग्न देखील पुढे ढकलण्यात येईल. म्हणून त्याने शाळेलाच आग लावली. दरम्यान, अग्निशमन दलाने तात्काळ शाळेला लागेल्या आगीवर नियंत्रण मिळवले.