India Vs Australia

ऑस्ट्रेलियाच्या सॅम कोन्स्टासला खांद्यावर टक्कर देणे विराट कोहलीला चांगलेच भोवले आहे. आयसीसीने विराटवर मॅच फीच्या 20 टक्के दंड ठोठावला आहे तसेच, एक डिमेरिट पॉइंट देण्यात आला आहे. एमसीजी येथे भारत ऑस्ट्रेलिया यांच्यात सुरु असलेल्या कसोट सामन्यात गुरुवारी सकाळी कोहली आणि कोन्स्टास यांची धडक झाली.

क्रिकेटमध्ये दुसऱ्या खेळाडूला धक्का देण्यास आयसीसीच्या नियमावलीनुसार चुकीचे आहे. आयसीसीच्या आचारसंहितेत कलम २.१२ नुसार अशा गोष्टींना प्रतिबंध करण्यात आला आहे. चुकीच्या पद्धतीने कोणत्याही खेळाडूला किंवा अम्पायरला धक्का देणे क्रिकेटमध्ये प्रतिबंधित आहे.

अशा प्रकारच्या घटनांचे गांभीर्य ठरविण्यासाठी काही महत्वाच्या गोष्टी विचारात घेतल्या जातात.

१) घटना कोणत्या परिस्थितीत घडली याबाबत विचार केला जातो. म्हणजेच जाणिवपूर्वक धक्का दिला का? किंवा ही घटना टाळण्यासाठी संधी होती का?

२) दोन खेळाडूंमध्ये आलेल्या संपर्कात जोर किती होता.

३) संपर्क आल्यानंतर किंवा या प्रसंगात कोणाला इजा झाली का?

एमसीजीच्या मैदानावर काय घडलं?

भारत आणि ऑस्ट्रेलिया यांच्यात सुरु असलेल्या सामन्यात गुरुवारी दहावी ओव्हर संपल्यानंतर विराट कोहली आणि सॅम कोन्स्टास यांच्या शाब्दीक चकमक झाल्याचे पाहायला मिळाले. विराटने सॅम कोन्स्टासला खांद्याने धक्का दिल्याची घटना घडली. यामुळे मैदानावर काहीसे वातावरण तापल्याचे पाहायला मिळाले. दरम्यान, उस्मान ख्वाजाने मध्यस्थी करत वातावरण शांत करण्याचा प्रयत्न केला.

याप्रकरणावरुन भारतीय क्रिकेट संघाचे माजी प्रशिक्षक रवी शास्त्री यांनी देखील विराटने केलेले कृत्य अनावश्यक असल्याचे मत मांडले. क्रिकेटमध्ये एक मर्यादा आहे आणि ती मर्यादा कोणीही ओलांडू नये, असे शास्त्री म्हणाले.