पॅलेस्टाईन राष्ट्रीय संघाचा माजी कर्णधार सुलेमान अहमद जैद अल-ओबैदचे वयाच्या ४१ व्या वर्षी निधन झाले. वृत्तानुसार, गाझा येथे इस्रायली हल्ल्यात हा पॅलेस्टिनी स्टार फुटबॉलपटूचा मृत्यू झाला. पॅलेस्टाईनमध्ये इस्रायली हल्ले सुरूच आहेत. पॅलेस्टाईन फुटबॉल असोसिएशनने (पीएफए) जैद अल-ओबैदच्या मृत्यूची माहिती दिलीय.

सुलेमान अल-ओबेदला 'पॅलेस्टिनी पेले' म्हणून ओळखलं जात होतं. पीएफएनुसार, गाझाच्या खादमत अल-शाती क्लबचा माजी स्टार फुटबॉलपटू सुलेमान अल-ओबैदने पॅलेस्टाइनसाठी २४ आंतरराष्ट्रीय सामने खेळले आहेत. सुलेमान अल-ओबेद यांनी त्यांच्या कारकिर्दीत १०० हून अधिक गोल केले, ज्यामुळे ते पॅलेस्टिनी फुटबॉलमधील सर्वात तेजस्वी ताऱ्यांपैकी एक बनले.

सुलेमान अल-ओबैद हा पॅलेस्टिनी फुटबॉल विश्वातील एक लोकप्रिय आणि आदरणीय खेळाडू मानला जात होता. १९६७ पासून इस्रायलच्या ताब्यात असलेल्या वेस्ट बँक अल-अमारी युथ सेंटर क्लबकडून त्याने अनेक वर्षे खेळ केला होता. मैदानावर त्याची उत्कृष्ट कौशल्ये, संघभावना आणि लढाऊ वृत्ती यामुळे तो पॅलेस्टिनी चाहत्यांचा आवडता बनला होता.

समोर आलेल्या माहितीनुसार, ऑक्टोबर २०२३ मध्ये हमासने इस्रायलवर केलेल्या हल्ल्यामुळे गाझा युद्ध सुरु झाल्यापासून आतापर्यंत क्रीडा क्षेत्रातील तब्बल ६६२ लोक मरण पावले आहेत.

तर फुटबॉल खेळाशी संबंधित ३२१ लोकांचा मृत्यू झाला आहे. तसंच, इस्रायलच्या हल्ल्यांमध्ये गाझातील किमान ६१,२५८ लोक मारले गेल्याची माहिती आहे.