Elon Musk: एलन मस्क यांनी ट्विटर खरेदी केल्यानंतर कंपनीच्या जगभरातील कर्मचाऱ्यांची कपात सुरू केली आहे. कंपनीच्या एकूण 7,500 कर्मचाऱ्यांपैकी जवळपास 50 टक्के कर्मचाऱ्यांना मस्क यांनी नारळ दिला आहे. यात भारतातील 200 हून अधिक कर्मचाऱ्यांचा समावेश आहे. (Twitter layoffs)

कंपनीच्या इंजीनियरिंग, सेल्स, मार्केटिंग आणि कम्युनिकेशन विभागातील कर्मचाऱ्यांची कपात करण्यात येत आहे. ट्विटर इंडियाच्या काही कर्मचाऱ्यांना नोकरीवरून हटविल्याचे ई-मेल्स आले आहेत. या आधी गुरूवारी कंपनीने इमेलद्वारे कर्मचाऱ्यांना कायमस्वरूपी न येण्यास सांगितले होते. या मेलमध्ये म्हटले होते की, जर तुम्ही ऑफिसमध्ये असाल किंवा ऑफिसमध्ये येण्यासाठी रस्त्यात असाल तर परत घरी जा.

मस्क यांनी याबाबत स्पष्टीकरण देणारे ट्विट केले आहे. त्यांनी म्हटले आङे की, कंपनीला दररोज 40 लाख डॉलर (32.77 कोटी रूपये) नुकसान होत आहे. त्यामुळे आमच्याकडे कर्मचारी कपात करण्याशिवाय पर्याच राहिलेला नाही. ज्यांना काढले गेले आहे, त्यांना 3 महिने सेव्हरन्स दिला गेला आहे. कायदेशीरदृष्ट्या दिल्या जाणाऱ्या रकमेपेक्षा ही रक्कम 50 टक्के जास्त आहे.

भारतात ट्विटरच्या कम्युनिकेशन विभागाच्या प्रमुख पल्लवी वालिया यांनी त्यांना काढून टाकल्याची माहिती दिली आहे. अशा इतरही अनेक कर्मचाऱ्यांना कंपनीने काढले आहे. अनेक कर्मचाऱ्यांनी आनंदाने ही कपात स्विकारली आहे.

कर्मचाऱ्यांना तीन प्रकारचे मेल...

कर्मचाऱ्यांना तीन प्रकारचे ईमेल्स पाठवले गेले आहेत. त्यापैकी एक ईमेल ज्या कर्मचाऱ्यांना काढण्यात आलेले नाही, त्यांना पाठवला आहे. त्यात म्हटले आहे की, कर्मचाऱ्यांची संख्या कमी झाल्याने तुमच्या कामावर परिणाम होणार नाही. एक मेल ज्यांना कामावरून काढले आहे, त्यांना पाठवला आहे. तर ज्या कर्मचाऱ्यांबाबत अद्याप काहीही निर्णय घेतला गेलेला नाही, त्यांनाही एक मेल पाठवला गेला आहे. त्यात म्हटले आहे की, ट्विटरसाठी तुमची भूमिका किती महत्वाची आहे, तुम्ही कोणत्या देशात आहात, यावरून तुमच्याबाबत निर्णय घेतला जाईल. दरम्यान, सॅन फ्रान्सिस्को येथील फेडरल कोर्टात या कर्मचारी कपातीविरोधात याचिका दाखल करण्यात आली आहे.