Finland's Prime Minister Sana Marin: फिनलंडच्या पंतप्रधान सना मरिन यांचा एक व्हिडिओ लीक झाल्यानंतर विरोधी पक्षांनी हल्लाबोल केला आहे. व्हिडिओमध्ये त्या दारु पिऊन मैत्रिणींसोबत डान्स करताना दिसत आहेत. बुधवारी रात्री उशिरा ही घटना घडल्याचे सांगण्यात येत आहे. हा व्हिडिओ समोर आल्यानंतर विरोधी पक्षांनी सना मरीन यांनी मैत्रिणींसोबत ड्रग्ज सेवन केल्याचा आरोप केला. विरोधक आता त्यांच्या राजीनाम्याची मागणी करत आहेत. तर दुसरीकडे, सना मरिन यांनी कबूल केले की, 'मी मैत्रिणींसोबत मद्यपान केले होते, परंतु ड्रग्ज घेण्याच्या अफवा आहेत. मी ड्रग्ज चाचणीसाठी तयार असल्याचे आव्हान फेटाळून लावते.'

दरम्यान, सोशल मीडियावर (Social Media) मोठ्या प्रमाणावर व्हायरल होत असलेल्या एका व्हिडिओमध्ये फिनलंडच्या पीएम सना मरीन मैत्रिणींसोबत मद्यपान करुन डान्स करताना दिसत आहेत. सोशल मीडियावर लोक पंतप्रधानांच्या व्हिडिओवर वेगवेगळ्या प्रतिक्रियाही देत आहेत. काहीजण अशा प्रकारच्या घटना सामान्य असल्याचे म्हणत आहेत, तर काहीजण सना मरीन फिनलंडच्या (Finland) पंतप्रधानपदासाठी योग्य नाहीत असे म्हणत आहेत.

दुसरीकडे, फिनलंडच्या स्पोर्ट्स टॉक शोचे होस्ट अ‍ॅलेक्सी वल्लावुरी यांनी मरीन यांना देशातील सर्वात अक्षम पंतप्रधान म्हटले आहे. कृपया तुम्ही तात्काळ राजीनामा द्या, असेही त्यांनी ट्विट करत म्हटले आहे.

तसेच, फिनलंडचे प्रतिष्ठित वृत्तपत्र इल्तालेहतीनुसार, व्हिडिओमध्ये मरीन या मैत्रिणीसोबत डान्स करताना दिसत आहेत. फिनिश रॅपर पेट्री नायगार्ड आणि पॉप गायक अँटी तुइस्कू यांच्या गाण्यांवर त्या डान्स करत आहे.

मी ड्रग टेस्टसाठी तयार आहे: सना मरीन

त्यांनी ज्या पार्टीला हजेरी लावली त्यात ड्रग्जचा वापर झाल्याचा आरोप विरोधकांनी केला आहे. यावर पंतप्रधान सना मरिन यांनी सांगितले की, ''आवश्यक असल्यास मी ड्रग्ज टेस्टसाठी तयार आहे. माझ्याकडे लपवण्यासारखे काहीही नाही. मी कधीही ड्रग्ज घेतलेले नाही,"