कोरोना महामारीमुळे जगभरातील अनेक लोकांनी आपला जीव गमावला आहे. अलीकडच्या काही दिवसांत युरोपातील अनेक देशांमध्ये कोरोना रुग्णांमद्धे पुन्हा वाढ होताना दिसत आहे. चीनच्या शांघायमध्ये कोरोनाने हाहाकार माजवला आहे. (Corona is spreading to many countries, including China)

चीन सरकारने लोकांवर अनेक निर्बंध लादले आहेत. येथे लॉकडाऊनमुळे कोट्यवधी लोकांना त्यांच्या घरात कैद राहावे लागत आहे. दुसरीकडे, शनिवारी इटलीमध्ये 70,520 नवीन कोरोना संसर्गाची प्रकरणे नोंदवण्यात आली आहेत. फ्रान्समध्येही कोविड-19 संसर्गाच्या प्रकरणांमध्ये वाढ झाली आहे. भारतातही कोरोनाच्या रुग्णांमध्ये मोठी वाढ झाली आहे. केंद्रीय आरोग्य मंत्रालयाने शनिवारी जारी केलेल्या आकडेवारीनुसार, कोरोना (Coronavirus) विषाणू संसर्गाची 2,527 नवीन प्रकरणे समोर आली आहेत. अमेरिकेतील अनेक शहरांमध्ये कोरोनाचा प्रादुर्भाव वाढल्यानंतर पुन्हा निर्बंध लादण्यात आले आहेत.

चीनमधील शांघायमध्ये कोरोना विषाणूचा संसर्ग झपाट्याने वाढला आहे. शांघाय हे कोरोनाचे 'हॉटस्पॉट' बनले आहे. शहरातील बहुतांश कामे ठप्प झाली आहेत. सुमारे 2.5 कोटी लोकांना त्यांच्या घरात कैद राहावे लागत आहे. चीनच्या जिलिन प्रांतासह इतर अनेक शहरांमध्ये कोविड-19 चा झपाट्याने प्रसार सुरू आहे.