China On PM Modi's Arunachal Pradesh Visit:

पंतप्रधान नरेंद्र मोदी यांनी नुकताच अरुणाचल प्रदेशचा दौरा केला होता. या दौऱ्यात त्यांनी हजारो कोटी रुपयांच्या विकास प्रकल्पांचे उद्घाटन केले होते.

यातील सर्वात विशेष म्हणजे सर्वात लांब बोगदा सेला पास. 13000 फूट उंचीवर बांधलेला हा जगातील सर्वात उंच बोगदा आहे.

पंतप्रधान नरेंद्र मोदींच्या या अरुणाचल भेटीने आणि हजारो कोटींच्या विकास प्रकल्पांमुळे चीनला मोठा धक्का बसला आहे. मोदींच्या या भेटीबाबत चीनने भारताकडे निषेध नोंदवला आहे.

चीनने अरुणाचल प्रदेशवर आपला हक्क सांगण्याचा खोटा दावा केला आहे आणि भारताच्या या कारवाईमुळे सीमा विवाद अधिकच गुंतागुंतीचा होईल असे म्हटले आहे.

चीनने असा दावा करण्याची ही पहिलीच वेळ नाही, याआधीही भारतीय नेत्यांच्या अरुणाचल दौऱ्यादरम्यान चीनने खोटे दावे केले आहेत. भारताने हे दावे ठामपणे फेटाळले आहेत.

नुकत्याच झालेल्या एका पत्रकार परिषदेत चीनच्या परराष्ट्र मंत्रालयाचे प्रवक्ते वांग वेनबिन यांनी पंतप्रधान नरेंद्र मोदी यांच्या शनिवारी अरुणाचल प्रदेश दौऱ्यावर आक्षेप व्यक्त केला.

ते म्हणाले की, "जंगनान (अरुणाचल प्रदेश) हा चीनचा प्रदेश आहे. भारताने बेकायदेशीरपणे स्थापन केलेल्या तथाकथित अरुणाचल प्रदेशला चीनने कधीही मान्यता दिलेली नाही आणि त्याला ठामपणे विरोधही केला आहे. ते म्हणाले की, चीन-भारत सीमाप्रश्न अद्याप सुटलेला नाही. चीनच्या जंगनान क्षेत्राचा मनमानी पद्धतीने विकास करण्याचा भारताला अधिकार नाही."

प्रवक्ते वांग वेनबिन पुढे म्हणाले की, "भारताच्या अशा हालचालींमुळे सीमा विवाद आणखी गुंतागुंतीचा होईल. भारत-चीन सीमेच्या पूर्वेकडील भागात भारतीय नेत्याच्या भेटीमुळे चीन असमाधानी आहे आणि त्याला विरोध करत असल्याचे ते म्हणाले.

पंतप्रधान मोदींनी गेल्या शनिवारी अरुणाचल प्रदेशला भेट देत हजारो कोटींच्या प्रकल्पांचे उद्घाटन आणि पायाभरणी केली.