कीव: युक्रेनियन अधिकाऱ्यांनी शुक्रवारी सांगितले की, गेल्या आठवड्यात मारियुपोलमधील थेटरवर रशियन हवाई हल्ला (Russia-Ukraine War) झाला. ज्यात सुमारे 300 लोक मारले गेले. युक्रेनने हा आतापर्यंतच्या युद्धात ज्ञात नागरिकांवरील सर्वात प्राणघातक हल्ला असल्याचे म्हटले आहे. हवाई हल्ले टाळण्यासाठी या थेटरमध्ये शेकडो लोक लपून बसले होते. युक्रेनच्या अधिकार्‍यांच्या म्हणण्यानुसार, इमारतीला लक्ष्य केले जाऊ नये म्हणून इमारतीच्या बाहेर दोन ठिकाणी पांढऱ्या अक्षरात रशियन भाषेत 'चिल्ड्रन' असे लिहिले होते, जेणेकरून नागरिकांनी या थेटरमध्ये आश्रय घेतल्याचे आकाशातून दिसून येईल. परंतु रशियन हवाई दलाने या थेटरलाही सोडले नाही.

हा हवाई हल्ला 16 मार्च रोजी रशियन हल्ल्यात उद्ध्वस्त झालेल्या मारियुपोल शहरात झाला होता. युक्रेन सरकार अनेक दिवसांपासून या हल्ल्यात ठार झालेल्या लोकांची संख्या सांगू शकले नाही. शुक्रवारी, युक्रेन सरकारने प्रत्यक्षदर्शींच्या हवाल्याने त्यांच्या टेलिग्राम चॅनेलवर थेटर हल्ल्यातील मृतांची संख्या जाहीर केली. मात्र, रशियाने हल्ला केल्याच्या वृत्ताला धूडकावून लावले आहे.

तरीही, ही बातमी मॉस्कोने जाणूनबुजून किंवा चुकून नागरिकांची हत्या करून युद्ध गुन्हा केल्याच्या आरोपांना उत्तेजन देणारी आहे. या घटनेमुळे युक्रेनला लष्करी मदत वाढवण्यासाठी नाटोवर दबाव वाढू शकतो. रशियाशी थेट युद्धात सहभागी होऊ नये म्हणून नाटोने आतापर्यंत युक्रेनवर युद्ध विमाने पुरवण्यास किंवा नो-फ्लाय झोन स्थापन करण्यास नकार दिला आहे.

अमेरिकेचे राष्ट्राध्यक्ष जो बायडन यांचे राष्ट्रीय सुरक्षा सल्लागार, जेक सुलिव्हन यांनी शुक्रवारी सांगितले की, थेटरवर झालेल्या रशियन बॉम्बहल्ल्याची बातमी ऐकून त्यांना धक्का बसला आहे, विशेषत: ते नागरी लक्ष्य होते. निष्पाप लोकांवरील हा हल्ला म्हणजे जीवनाकडे पाहण्याचा क्रूर दृष्टीकोन आहे. युक्रेनचे मारियुपोल शहर पूर्णपणे उद्ध्वस्त झाले असून, आकाशातून बॉम्बफेकीमुळे पोकळ इमारती आणि जमिनीवरील खड्डे आणि पडलेले मृतदेह दिसत आहेत.

दरम्यान रशियन सैन्याने म्हटले आहे की युक्रेनमध्ये त्यांचे 1,351 सैनिक मारले गेले आणि 3,825 जखमी झाले. मात्र, मृतांमध्ये मॉस्को समर्थक फुटीरतावादी दलांचा समावेश आहे की नॅशनल गार्डसारख्या संरक्षण मंत्रालयाचा भाग नाही हे अद्याप स्पष्ट झाले नाही. या आठवड्याच्या सुरुवातीला, नाटोचा अंदाजानुसार 4 आठवड्यांच्या लढाईत 7,000 ते 15,000 रशियन सैनिक मारले गेले.