Khalistani Terrorist Hardeep Singh Nijjar: कॅनडातील सरे येथे काही दिवसांपूर्वी खलिस्तानी दहशतवादी हरदीपसिंग निज्जरची (Khalistani Terrorist Hardeep Singh Nijjar) गोळ्या झाडून हत्या करण्यात आली. त्यानंतर, कॅनडाचे पंतप्रधान जस्टिन ट्रूडो यांनी हरदीप सिंग निज्जर याच्या मृत्यूबाबत भारताविरोधात टिप्पणी केली, त्यानंतर दोन्ही देशांमधील राजनैतिक संबंध बिघडले.

यातच आता, अमेरिकन तपास संस्था एफबीआय (फेडरल ब्युरो ऑफ इन्व्हेस्टिगेशन) ने अमेरिकास्थित (America) असलेल्या अनेक शीख नेत्यांची भेट घेतली आणि त्यांना इशारा दिला की त्यांच्या जीवालाही धोका आहे.

एफबीआयच्या अधिकाऱ्यांनी शीख नेत्यांची भेट घेतली

अमेरिकन शीख कॉकस कमिटीचे समन्वयक आणि राजकीय कार्यकर्ते प्रीतपाल सिंग यांनी सांगितले की, ते आणि इतर दोन अमेरिकन शीख नेत्यांनी एफबीआय अधिकाऱ्यांची भेट घेतली.

कॅलिफोर्निया स्थित गैर-लाभकारी ग्रुप, Ensaaf चे सह-संचालक सुखमन धामी यांनी सांगितले की, अमेरिकेतील शीख नेत्यांना एफबीआयकडून संभाव्य धोक्यांबद्दल चेतावणी प्राप्त झाली आहे.

जस्टिन ट्रुडो यांचे भारताविरोधात वक्तव्य

कॅनडाचे पंतप्रधान जस्टिन ट्रूडो यांनी कॅनडाचा (Canada) नागरिक आणि शीख फुटीरतावादी नेता निज्जर याच्या हत्येमध्ये भारतीय गुप्तचर यंत्रणांचा हात असल्याचा आरोप केला. त्यानंतर भारत आणि कॅनडा यांच्यातील संबंध ताणले गेले. निज्जरला 2020 मध्ये भारताने दहशतवादी घोषित केले होते. यातच, भारताने कॅनडा सरकारचे दावे फेटाळून लावले आहेत.