US Flights Grounded: अमेरिकेच्या मध्यवर्ती हवाई वाहतूक प्रशासनाच्या (एफएए) यंत्रणेमध्ये झालेल्या तांत्रिक बिघाडाचा मोठा फटका या देशातील विमान वाहतुकीला बसला. यामुळे अनेक विमानांची उड्डाणे स्थगित करण्यात आली, तर काहींच्या उड्डाणाला विलंब झाला.

या घटनेनंतर तातडीने बिघाड दुरुस्त करण्याचे प्रयत्न सुरू झाले होते. त्यामध्ये यंत्रणेला बऱ्याचअंशी यशही आले; पण यंत्रणा पूर्ववत व्हायला किमान दोन दिवसांचा अवधी लागेल, असे अधिकाऱ्यांनी सांगितले.

यानंतर ‘व्हाइट हाउस’मध्ये तातडीने आपत्कालीन बैठकीचे आयोजन करण्यात आले होते. स्थानिक प्रमाणवेळेनुसार सकाळी सहापर्यंतची सगळी उड्डाणे ही विलंबाने करावीत असे निर्देश ‘एफएए’ने विमान कंपन्यांना दिले आहेत.

अमेरिकेच्या हवाई वाहतूक प्रणालीतील तांत्रिक बिघाडाचा भारतातील विमान वाहतुकीवर परिणाम होणार नाही असे नागरी विमान वाहतूक संचालनालयाने म्हटले आहे.

अमेरिकेकडे जाणाऱ्या विमानांच्या सेवेवर देखील याचा काही परिणाम होणार नसल्याचे ‘डीजीसीए’ने म्हटले आहे. भारतामधील सर्वच उड्डाणे सुरळीतपणे सुरू असल्याचे सांगितले.