शनिवारी पहाटे दक्षिण इराणमध्ये 6.1 रिश्टर स्केल तीव्रतेच्या भूकंपामुळे किमान तीन जणांचा मृत्यू झाला, अशी माहिती सरकारी टेलिव्हिजनने दिली आहे. इराणच्या (Iran) आखाती किनारपट्टीवरील होर्मोझगान प्रांतातील आपत्कालीन व्यवस्थापनाचे प्रमुख मेहरदाद हसनजादेह यांनी टेलिव्हिजनला सांगितले की, "दुर्दैवाने आतापर्यंत आमच्याकडे तीन मृत्यू आणि आठ लोक जखमी झाले आहेत." (6.1 magnitude earthquake shakes Iran 3 killed quake shakes UAE)

इराणी प्रसारमाध्यमांनी भूकंपाची (EarthQuake) तीव्रता 6.1 सांगितली तर युरोपियन भूमध्य भूकंपशास्त्र केंद्र (EMSC) ने सांगितले की त्याची तीव्रता 6.0 एवढी होती. हा भूकंप 10 किमी (6.21 मैल) खोलीवर होता, असे EMSC ने सांगितले आहे.

यूएईच्या विविध भागांतील रहिवाशांनाही भूकंपाचे धक्के जाणवले आहेत. नॅशनल सेंटर फॉर मेटिऑरॉलॉजी (NCM) नुसार, दक्षिण इराणमध्ये सकाळी 1.32 वाजता भूकंपाची नोंद 10 किमी खोलीवर करण्यात आली आहे. मीडिया रिपोर्ट्सनुसार, यूएईमध्ये भूकंपाचे धक्के जाणवले पण त्याचा कोणताही वाईट परिणाम झालेला नाही.