17 Indian Youth From Punjab And Haryana Rescued Trapped In Libya:

लिबियातील त्रिपोली तुरुंगात असलेले १७ भारतीय तरुण सोमवारी दिल्ली विमानतळावर दाखल झाले. विमानतळावर त्यांच्या कुटुंबीयांनी त्यांचे स्वागत केल्यानंतर ते भावूक झाले.

विमानतळावर पोहोचलेल्या तरुणांचा एक व्हिडिओ सोशल मीडियावर व्हायरल झाला. मोठ्या पगाराच्या नोकऱ्यांसाठी त्यांना इटलीला पाठवण्याच्या बहाण्याने ट्रॅव्हल एजंटांकडून फसवणूक केल्यानंतर ते गेल्या सहा महिन्यांपासून लिबियात अडकून पडले होते. एजंटांनी प्रत्येक व्यक्तीकडून 13 लाख रुपये घेतले होते.

अहवालानुसार, सर्व भारतीय तरुण फेब्रुवारी 2023 मध्ये दुबई आणि नंतर इजिप्त मार्गे इटलीसाठी निघाले. काही दिवसांनी इजिप्तमध्ये उतरल्यानंतर ते लिबियात आले.

राज्यसभा खासदार विक्रमजीत सिंह साहनी यांनी सांगितले की, त्यांना मानवी तस्करांनी लिबियातील झुवारा शहरात ठेवले होते, जिथे त्यांना अन्न आणि पाणी सुद्धा मिळाले नाही. त्यांच्यावर हल्लेही करण्यात आले.

यापूर्वी, खासदार विक्रमजीत सिंह साहनी यांनी माहिती दिली की "गेल्या 6 महिन्यांपासून लिबियामध्ये माफियांच्या कैदेत अडकलेल्या 17 भारतीय मुलांची सुटका करण्यात आली आहे आणि त्यांना भारतात परत आणण्यात आले आहे."

खासदार विक्रमजीत सिंह साहनी यांनीच या तरुणांना मायदेशी आणण्याची प्रक्रिया सुरू केली. साहनी यांनी 17 तरुणांच्या विमान तिकिटांचा खर्च केला आणि त्यांना नोकरीचे कौशल्य उपलब्ध करून देण्यासाठी लागणारा खर्चही आपण उचलणार असल्याचे आश्वासन दिले.

ट्रॅव्हल एजंटांवर कारवाईची मागणी

लिबियातील १७ तरुणांच्या मायदेशी परतल्याबद्दल आनंद व्यक्त करताना विक्रमजीत सिंह साहनी म्हणाले की, "अकालपुरख वाहेगुरुजींच्या आशीर्वादाने आम्ही पंजाब आणि हरियाणातील १७ तरुणांना लिबियातील माफियांच्या तावडीतून बाहेर काढण्यात यश मिळवले.

या 17 तरुणांना फसवत प्रत्येकाची 13 लाख रुपये फसवणूक करण्याऱ्या ट्रॅव्हल एजंटांवर तात्काळ एफआयआर दाखल करण्याची मागणीही त्यांनी केली.