Jharkhand Crime: देशात महिलांवरील अत्याचाराच्या घटना सातत्याने समोर येत आहेत. मणिपूरनंतर झारखंडमधून माणुसकीला काळिमा फासणारी घटना समोर आली आहे.

येथील गिरिडीह जिल्ह्यातील सारिया पोलीस स्टेशन हद्दीतील कोबाडिया टोला गावात एका महिलेला विवस्त्र करुन झाडाला बांधून बेदम मारहाण करण्यात आली.

ज्या ठिकाणी हे घृणास्पद कृत्य घडले ते ठिकाण राज्याची राजधानी रांचीपासून सुमारे 170 किलोमीटर अंतरावर आहे.

दरम्यान, या प्रकरणाची माहिती मिळताच पोलिसांनी घटनास्थळ गाठून ग्रामस्थांच्या मदतीने पीडितेला स्थानिक रुग्णालयात दाखल केले.

पीडित महिलेच्या जबाबाच्या आधारे पोलिसांनी (Police) दोन महिलांसह चार गावकऱ्यांना अटक करुन या प्रकरणाचा तपास सुरु केला आहे. अवैध संबंधातून आरोपीने हा प्रकार केल्याचे पोलिसांच्या तपासात समोर आले आहे.

महिलेला विवस्त्र करुन मारहाण

पोलिसांनी दिलेल्या माहितीनुसार, आरोपींनी फसवणूक करुन महिलेला रात्री उशिरा घराबाहेर बोलावले. त्यानंतर तिला जबरदस्तीने पकडून गावाबाहेर नेले. तिथे त्यांनी महिलेला विवस्त्र करुन झाडाला बांधून बेदम मारहाण केली.

विकास कुमार सोनार, श्रावण सोनार, मुन्नी देवी आणि रेखा देवी अशी पोलिसांनी अटक केलेल्यांची नावे आहेत.

पोलिसांनी आरोपींची (Accused) कसून चौकशी केली असता चारही आरोपींनी आपल्या गुन्ह्याची कबुली दिली. या सर्व आरोपींना आता तुरुंगात पाठवण्याची तयारी सारिया पोलीस ठाण्याने केली आहे.

पोलिसांनी चार आरोपींना अटक केली

गिरिडीह जिल्ह्यातील सरिया एसडीपीओ नौशाद आलम यांनी महिलेच्या वक्तव्याच्या आधारे चार आरोपींना अटक केल्याची पुष्टी केली आहे. एसडीपीओ म्हणाले की, या लज्जास्पद कृत्यात जो कोणी सहभागी असेल त्याला सोडले जाणार नाही.

दुसरीकडे, झारखंड विधानसभेचे पावसाळी अधिवेशन शुक्रवारपासून सुरु होत आहे. गिरिडीह जिल्ह्यामधील सारिया पोलीस स्टेशन परिसरातील एका दलित महिलेच्या लज्जास्पद घटनेचा मुद्दा बनवून भाजपने राज्य सरकारला घेरण्याची रणनीती आखण्यास सुरुवात केली आहे.