मध्य प्रदेशातील इंदूरमध्ये एक धोकादायक प्रकार समोर आला आहे. चालत्या बाईकवर एक महिलेने जीवाशी खेळ करत स्टंट केल्याचा व्हिडिओ सध्या सोशल मीडियावर वेगाने व्हायरल होत आहे. या व्हिडिओमध्ये ती तरूणी हेल्मेटशिवाय, दोन्ही हात सोडत अतिशय वेगात बाईक चालवताना दिसते. या धोकादायक कृतीमुळे नागरिकांनी चिंता व्यक्त केली असून, पोलिसांनीही याची गंभीर दखल घेतली आहे.

व्हिडिओ सोशल मीडियावर मोठ्या प्रमाणावर शेअर होताच इंदूर पोलिसांनी तत्काळ कारवाई केली. पोलिसांनी सांगितले की, हा प्रकार केवळ वाहतूक नियमांचा भंग नाही तर सार्वजनिक सुरक्षेलाही गंभीर धोका निर्माण करणारा आहे. प्राथमिक तपासानुसार, तरूणीने ना हेल्मेट घातले होते ना बाईकवर नियंत्रण ठेवण्यासाठी आवश्यक खबरदारी घेतली होती. दोन्ही हात मोकळे ठेवून केलेला हा स्टंट अत्यंत जोखमीचं असल्याचे पोलिसांनी म्हटले आहे.

इंदूर पोलिसांनी सायबर सेल आणि गुन्हे शाखेच्या पथकाला तपासाची जबाबदारी दिली आहे. या तरूणीची ओळख पटवण्यासाठी तपास सुरू आहे. पोलिसांनी सांगितले की, व्हिडिओमध्ये दिसणाऱ्या तरूणीची ओळख पटवून तिला चौकशीसाठी बोलावले जाईल.

कारवाईची तयारी

पोलिस अधिकाऱ्यांच्या माहितीनुसार, ओळख पटल्यावर महिलेचे समुपदेशन करण्यात येईल, तसेच वाहतूक नियमांचे उल्लंघन केल्याबद्दल तरूणीवर चलनाची कारवाई केली जाईल. अशा प्रकारचे धोकादायक स्टंट समाजात चुकीचा संदेश देतात आणि त्यामुळे इतर तरुणही प्रेरित होऊ शकतात, असे पोलिसांनी नमूद केले आहे.

नागरिकांना इशारा

इंदूर पोलिसांनी नागरिकांना आवाहन केले आहे की, स्वतःच्या आणि इतरांच्या सुरक्षेची जबाबदारी घ्या, आणि अशा धोकादायक स्टंटपासून दूर राहा. हेल्मेट न घालणे आणि वाहतूक नियमांचे उल्लंघन करणे हे केवळ कायद्याने गुन्हा नसून, जीवावर बेतणारा धोका देखील आहे.

या प्रकरणामुळे पुन्हा एकदा सोशल मीडियावर "स्टंट व्हिडिओ संस्कृती"बद्दल चर्चा रंगली आहे आणि प्रशासनाकडून यावर कठोर पावले उचलण्याची मागणीही सुरू झाली आहे.