Uttar Pradesh Crime News: उत्तर प्रदेशातील पिलीभीत जिल्ह्यातील लोहरपुरी गावातून एक धक्कादायक घटना समोर आली. आपल्या प्रेमीसोबत संसार थाटण्याच्या हव्यासापोटी एका 37 वर्षीय महिलेने आपल्या पतीची निर्घुण हत्या केली. रात्रीच्या वेळी आधी पतीला गुंगीचे औषध मिसळलेले कोल्ड ड्रिंक पाजले आणि त्यानंतर तो बेसावध झाल्यावर स्वतःच्याच साडीने त्याचा गळा आवळून त्याला संपवले. या थरारक घटनेनंतर आरोपी महिला फरार झाली होती, परंतु पोलिसांनी अवघ्या काही तासातच तिला ताब्यात घेतले. तिने आपल्या गुन्ह्याचीही कबुली दिली.

लोहरपुरी गावात राहणारे 42 वर्षीय उमाशंकर हे शेती करुन आपल्या कुटुंबाचा उदरनिर्वाह करत होते. सुमारे 20 वर्षांपूर्वी त्यांनी ममता हिच्याशी प्रेमविवाह केला होता. त्यांना 18 वर्षांचा मुलगा विकास आणि 12 वर्षांची मुलगी अशी दोन मुले आहेत. शुक्रवारी संध्याकाळी ममता घरात कोल्ड ड्रिंक घेऊन आली होती. तिने मुलाला आणि मुलीलाही ते पिण्यास सांगितले, परंतु मुलांनी नकार दिला. त्यानंतर ती घराच्या छतावर गेली, जिथे उमाशंकर विश्रांती घेत होते. ममताने त्यांना ते नशायुक्त कोल्ड ड्रिंक पाजले आणि दोन्ही मुले खाली झोपायला निघून गेली.

रात्री उशिरा छतावरुन काही विचित्र आवाज आल्याने 12 वर्षांच्या मुलीला जाग आली. तिने भावाला उठवले आणि दोघेही छतावर गेले. तिथे त्यांची आई गायब होती आणि वडील उमाशंकर निपचित पडले होते. मुलांनी त्यांना उठवण्याचा प्रयत्न केला, मात्र त्यांच्या शरीराची कोणतीही हालचाल होत नव्हती आणि त्यांच्या गळ्याला साडी घट्ट गुंडाळलेली आढळली. घाबरलेल्या मुलांनी तात्काळ शेजाऱ्यांना बोलावले आणि मुलगा विकासने थेट पोलीस ठाणे गाठून घटनेची माहिती दिली. पोलिसांनी घटनास्थळी पोहोचून मृतदेह ताब्यात घेतला आणि पोस्टमार्टमसाठी पाठवला.

घटना घडल्यानंतर पळून गेलेली आरोपी महिला घरापासून अवघ्या 300 मीटर अंतरावर लपलेली आढळली. गावकऱ्यांच्या मदतीने पोलिसांनी तिला ताब्यात घेतले. तपासादरम्यान समोर आलेल्या माहितीनुसार, उमाशंकर कामानिमित्त गुजरातला (Gujrat) गेले असताना ममताच्या संपर्कात भावेश नावाचा एक युवक आला आणि त्यांच्यात प्रेमसंबंध निर्माण झाले. यावरुन पती-पत्नीमध्ये सतत वाद होत असत. जुलै महिन्यात उमाशंकर पत्नीला गावी घेऊन आले होते, परंतु ममता वारंवार प्रेमीकडे जाण्याचा तगादा लावत होती. याच वादातून आणि प्रेमीसोबत राहण्याच्या इच्छेतून तिने पतीचा काटा काढल्याचे उघड झाले.