उत्तर प्रदेश: कानपूर येथून एक धक्कादायक घटना समोर आली आहे. सहा वर्षीय अल्पवयीन मुलीवर लैंगिक अत्याचार करण्यात आला असून, तिने प्रतिकार करताच तिच्या तोंडात झाडाची पाने कोंबण्यात आली व डोक्यात वीटेने माराहण करुन जखमी केली. मुलगी मृत झाल्याचे समजून संशयित आरोपीने घटनास्थळावरुन पळ काढला.

पीडित मुलीच्या घरच्यांना घटनेची माहिती मिळताच एकच खळबळ उडाली. मुलीला उपचारासाठी तात्काळ रुग्णालयात दाखल करण्यात आले, त्यानंतर जिल्हा रुग्णालयात तिला हलविण्यात आले. पोलिसांनी याप्रकरणी गुन्हा नोंद करुन तपासास सुरुवात केली आहे.

पीडित मुलीच्या वडिलांनी याप्रकरणी पोलिसांत लेखी तक्रार दाखल केली आहे. घराच्या शेजारी राहणारा व्यक्ती मुलीला चॉकलेट देतो असे सांगत सोबत घेऊन गेला. संशयित व्यक्तीने मुलीवर लैंगिक अत्याचार केला.

मुलगी वेदनेने विव्हळत असताना नराधमाने तिच्या तोंडात झाडाची पाने कोंबली, तरीही ती थांबत नसल्याने तिच्या डोक्यावर वीटेने जोरदार प्रहार केला. रक्तबंबाळ मुलीला तिथेच टाकून संशयिताने घटनास्थळावरुन पळ काढला, असे तक्रारीत म्हटले आहे.

पीडित मुलीची प्रकृती चिंताजनक

पीडित मुलगी रक्ताच्या थारोळ्यात पडल्याचे पाहताच गावकऱ्यांनी घटनेची माहिती तिच्या नातेवाईकांना दिली. कुटुंबीय घटनास्थळी दाखल झाल्यानंतर मुलीला घातमपूर येथील ग्रामीण रुग्णालयात दाखल केले. प्राथमिक उपचार केल्यानंतर पुढील उपचारासाठी तिला कानपूर जिल्हा रुग्णालयात दाखल करण्यात आले आहे.

कुटुंबीयांनी दाखल केलेल्या तक्रारीच्या आधारे पोलिसांनी याप्रकरणी गुन्हा नोंद केला असून, याप्रकरणी अधिक तपास केला जात आहे. संशयित व्यक्ती पीडित मुलीच्या घराजवळ राहत होता आणि मुलगी संशयिताला काका म्हणून हाक मारायची.

चॉकलेटचे आमिष दाखवून संशयिताने तिच्या लैंगिक अत्याचार केल्याची माहिती पोलिसांनी एका स्थानिक वृत्तपत्राला दिली आहे. दरम्यान, संशयिताचा शोध घेण्यासाठी पोलिसांनी विविध टीम तयार केल्या असून, त्याचा शोध घेतला जात आहे.