CUSAT Fest Accident: केरळमधील कोची येथील कुसॅट विद्यापीठात शनिवारी एका संगीत कार्यक्रमादरम्यान मोठा अपघात झाला. विद्यापीठात झालेल्या चेंगराचेंगरीत चार विद्यार्थ्यांचा मृत्यू झाला. तर अनेक विद्यार्थी जखमी झाले आहेत. आरोग्य मंत्री वीणा जॉर्ज यांनी सांगितले की, निकिता गांधी यांच्या कॉन्सर्ट दरम्यान हा अपघात झाला.

मिळालेल्या माहितीनुसार, विद्यापीठ (University) कॅम्पसमधील ओपन एअर ऑडिटोरियममध्ये संगीत मैफलीचे आयोजन करण्यात आले होते. आरोग्यमंत्र्यांनी सांगितले की, जखमींवर उपचारासाठी कलामसेरी वैद्यकीय महाविद्यालयात व्यवस्था करण्यात आली आहे.

चेंगराचेंगरीत जीव गमावलेल्या चार विद्यार्थ्यांमध्ये 2 मुले आणि 2 मुली आहेत. तर दोन विद्यार्थिनींची प्रकृती चिंताजनक असल्याचे सांगण्यात येत आहे. प्राथमिक विश्लेषणानुसार, जेव्हा पाऊस सुरु झाला तेव्हा मागच्या बाजूला असलेले विद्यार्थी समोरच्या दिशेने धावू लागले. त्याचदरम्यान चेंगराचेंगरी झाली. त्यानंतर परिस्थिती नियंत्रणाबाहेर गेली.

दरम्यान, अचानक पाऊस सुरु झाल्याने चेंगराचेंगरी झाल्याची माहिती विद्यापीठाच्या कुलगुरुंनी दिली. ते म्हणाले की, 'शुक्रवारी महोत्सवाला सुरुवात झाली. फेस्टचा एक भाग म्हणून अनेक कार्यक्रम आयोजित केले जाणार होते. याच क्रमाने आज संगीताचा कार्यक्रम सुरु होता. यावेळी शेजारील महाविद्यालयातील विद्यार्थीही कार्यक्रमात सहभागी होण्यासाठी आले होते. दुर्दैवाने गर्दी खूप वाढली. 2,000 हून अधिक लोक आत आले आणि पायऱ्यांवर धावू लागले.'

दुसरीकडे, कोची नगरपालिकेचे नगरसेवक प्रमोद यांनीही या घटनेबाबत निवेदन दिले आहे. एकाच गेटमधून प्रवेश आणि बाहेर पडल्याने चेंगराचेंगरी झाल्याचे त्यांनी सांगितले. प्रमोद म्हणाले की, ''विद्यार्थी (Students) त्याच गेटमधून येण्याचा प्रयत्न करत होते. पायऱ्यांवरुन आत प्रवेश करणारे विद्यार्थी आधी पडले आणि नंतर गेटवर असलेल्या प्रचंड गर्दीने त्यांना चिरडले.''