कर्नाटक: नववीत शिकणाऱ्या विद्यार्थीनीने शाळेच्या वॉशरुममध्ये बाळाला जन्म दिला. शहापूर येथील सरकारी शाळेत हा धक्कादायक प्रकार घडला. बुधवारी (२७ ऑगस्ट) सायंकाळी ही घटना घडली.

कर्नाटकच्या बालहक्क आयोगाने या घटनेची गंभीर दखल घेतली असून, घटनेचा सखोल तपास करुन संशयिताविरोधात गुन्हा दाखल करुन, सविस्तर अहवाल सादर करण्याचे आदेश दिले आहेत.

मिळालेल्या अधिकच्या माहितीनुसार, अल्पवयीन विद्यार्थीनीला उपचारासाठी शासकीय रुग्णालयात दाखल करण्यात आले आहे. शालेय प्रशासनाने देखील याबाबत दुर्लक्ष केल्याचा ठपका शाळेवर ठेवण्यात आला आहे.

बाल हक्क आयोगाच्या आयुक्तांनी याप्रकरणी स्वेच्छा दखल घेऊन शाळेविरोधात देखील तक्रार दाखल करणार असल्याचे स्पष्ट केले आहे. दरम्यान, बाळ आणि अल्पवयीन विद्यार्थीनीची तब्येत व्यवस्थित असल्याचे सांगण्यात आले आहे.

याप्रकरणाची माहिती बाहेरुन मिळाल्याचे आयुक्तांनी स्पष्ट केली असून, याबाबत सविस्तर अहवाल तयार करण्याचे आदेश देण्यात आले आहेत.

शाळेच्या मुख्याध्यापकांनी मात्र याबाबत त्यांना काही कल्पना नसल्याचे सांगताना, विद्यार्थीनी गरोदर असल्याची कोणतीही लक्षणे न दिसल्याचे ते म्हणाले. तसेच, विद्यार्थीनी अनेक दिवस गैरहजर होती, असेही त्यांनी सांगितले.

काही दिवसांपूर्वीच मुख्याध्यापकपदाची जबाबदारी स्वीकारली असल्याचेही मुख्याध्यापक म्हणाले. विद्यार्थीनीचे वय १७ वर्षे ८ महिने असून, ०५ ऑगस्टपासून तिने शाळेत यायला सुरुवात केल्याचेही ते म्हणाले. विद्यार्थीनीने बाळाला जन्म दिल्याने शाळेतील शिक्षकांना देखील आर्श्चयाचा धक्का बसल्याचे ते म्हणाले.