Chhattisgarh: छत्तीसगडमधून एक मोठी बातमी समोर आली आहे. सुरक्षा दले अणि नक्षलवादी यांच्यात पुन्हा एकदा चकमक झाली. नारायणपूर, बिजापूर आणि दांतेवाडा सीमेवरील नक्षलग्रस्त भागात जवानांनी 7 नक्षलवाद्यांचा खात्मा केला. घटनास्थळावरुन आतापर्यंत दोन नक्षलवाद्यांचे मृतदेह ताब्यात घेण्यात आले आहेत. असे सांगितले जात आहे की, गुरुवारी तीन जिल्ह्यांतील 1000 जवान सर्च ऑपरेशन करत होते. यादरम्यान नक्षलवादी आणि जवानांमध्ये वेगवेगळ्या भागात चकमक सुरु झाली. नारायणपूरचे एसपी प्रभात कुमार यांनी या घटनेला दुजोरा दिला आहे.

दरम्यान, छत्तीसगडमध्ये नक्षलवाद्यांविरोधात सुरक्षा दलांची कारवाई सुरु आहे. दांतेवाडा येथील पोलीस आणि नक्षलवाद्यांमध्ये झालेल्या चकमकीत आतापर्यंत सात नक्षलवादी ठार झाले आहेत. हा आकडा आणखी वाढू शकतो, अशी माहिती समोर येत आहे.

पोलिसांच्या पथकावर गोळीबार करण्यात आला

सर्च ऑपरेशन सुरु असताना जंगलात लपलेल्या नक्षलवाद्यांनी सुरक्षा दलांवर गोळीबार सुरु केला. मिळालेल्या माहितीनुसार, 10 ते 12 नक्षलवादी जखमी झाल्याची शक्यता आहे. सध्या संपूर्ण परिसराला सुरक्षा दलांनी वेढा घातला असून कारवाई सुरु आहे.

महिन्याभरात अनेक नक्षलवादी मारले गेले

30 एप्रिल रोजी नारायणपूर आणि कांकेर जिल्ह्यांच्या सीमेवरील जंगलात सुरक्षा जवानांशी झालेल्या चकमकीत तीन महिलांसह दहा नक्षलवादी ठार झाले होते. पोलिसांनी दिलेल्या माहितीनुसार, 16 एप्रिल रोजी कांकेर जिल्ह्यात झालेल्या चकमकीत सुरक्षा दलांनी 29 नक्षलवाद्यांना ठार केले होते. 10 मे रोजी बिजापूर जिल्ह्यातील पिडिया गावाजवळ सुरक्षा जवानांशी झालेल्या चकमकीत 12 नक्षलवादी ठार झाले.