बॉक्स ऑफिसवर धुमाकूळ घालणाऱ्या 'सैय्यारा' चित्रपटाची क्रेझ आता सगळीकडेच पाहायला मिळत आहे. रिलीजनंतर अवघ्या काही दिवसांत या चित्रपटाने तब्बल १६५.४६ कोटी रुपयांचा गल्ला जमवला असून विशेषतः तरुण प्रेक्षकांमध्ये या चित्रपटाची लोकप्रियता अफाट वाढली आहे.

या चित्रपटाच्या प्रभावामुळे काही प्रेक्षक थिएटरमध्ये बेशुध्द होण्याच्या घटनाही घडल्या आहेत, मात्र आता याच क्रेझमुळे ग्वाल्हेरमधील डीबी मॉलमधील थिएटरबाहेर घडलेला एक धक्कादायक प्रकार चर्चेचा विषय ठरत आहे.

प्रेयसीवरून वाद

मिळालेल्या माहितीनुसार, ग्वाल्हेरमधील पडाव पोलीस ठाण्याच्या परिसरातल्या डीबी मॉलमध्ये दोन तरुण 'सैय्यारा' चित्रपट पाहण्यासाठी आले होते. चित्रपट पाहून बाहेर पडताच दोघांमध्ये त्यांच्या प्रेयसीच्या मुद्द्यावरून वाद उफाळून आला. वाद इतका टोकाला गेला की, दोघांनी एकमेकांवर लाथा-बुक्क्यांचा वर्षाव करण्यास सुरुवात केली.

एका तरुणाने दुसऱ्याला जमिनीवर फेकले, तर तो दुसराच पुन्हा उभा राहून पहिल्याला ढकलून दिलं. थिएटरच्या बाहेर हे थरारक दृश्य पाहण्यासाठी लोकांची मोठी गर्दी जमली. काहींनी दोघांना वेगळं करण्याचा प्रयत्न केला पण त्यांचा राग शांत होईना.

घटनेचा व्हिडिओ तिथे उपस्थित असलेल्या एका व्यक्तीने मोबाईलमध्ये शूट केला आणि सोशल मीडियावर टाकला. काही तासांतच व्हिडिओ व्हायरल झाला आणि नेटिझन्सनी त्यावर मजेशीर आणि टीकात्मक कमेंट्स करायला सुरुवात केली.

या संपूर्ण घटनेचा व्हिडिओ सोशल मीडियावर व्हायरल झाला असला, तरी पोलिसांकडे अद्याप कोणतीही तक्रार दाखल झालेली नाही. त्यामुळे पोलीस कारवाई होण्याची शक्यता कमी आहे.