Injured Player Rule Cricket: भारत आणि इंग्लंड यांच्यातील 5 कसोटी सामन्यांची मालिका 2-2 अशा बरोबरीत संपली. लंडनच्या केनिंग्टन ओव्हल मैदानावर खेळला गेलेला शेवटचा सामना भारताने 6 धावांनी जिंकून ही मालिका बरोबरीत सोडवली. या संपूर्ण मालिकेत दोन्ही संघांमध्ये मैदानावर अनेक वाद झाले, पण त्यापैकी एक वादाची सर्वाधिक चर्चा झाली. सामन्यादरम्यान एखादा खेळाडू जखमी झाल्यास त्याच्या जागी दुसऱ्या खेळाडूला खेळवण्याची परवानगी देण्याबाबतचा हा वाद होता. यावर इंग्लंडचा कर्णधार बेन स्टोक्सने विचित्र प्रतिक्रिया दिली होती, ज्याला आता भारताचा अनुभवी खेळाडू रविचंद्रन अश्विनने (Ravichandran Ashwin) जोरदार प्रत्युत्तर दिले.

अश्विनचे स्टोक्सला जोरदार प्रत्युत्तर

मँचेस्टर कसोटीत भारताचा यष्टीरक्षक-फलंदाज ऋषभ पंत (Rishabh Pant) फलंदाजी करताना त्याच्या उजव्या पायाला दुखापत झाली. स्कॅन केल्यानंतर त्याच्या पायाला फ्रॅक्चर झाल्याचे समोर आले, तरीही तो रिटायर्ड हर्ट झाल्यानंतर पुन्हा फलंदाजीला आला. याच घटनेनंतर भारतीय संघाच्या मुख्य प्रशिक्षकांनी जखमी खेळाडूच्या जागी दुसऱ्या खेळाडूला मैदानात उतरवण्याची परवानगी देण्याबाबत चर्चा केली होती.

यावर जेव्हा बेन स्टोक्सला विचारण्यात आले, तेव्हा त्याने 'मस्करी' करत टाळले. त्याने याला एक 'मजेदार कल्पना' म्हणून हसण्यावारी नेले. आता अश्विनने स्टोक्सच्या याच वक्तव्याला प्रत्युत्तर दिले.

दरम्यान, आपल्या यूट्यूब चॅनेलवर बोलताना अश्विन म्हणाला की, "तामिळमध्ये एक म्हण आहे, ज्याचा अर्थ सरळ आहे, तुम्ही जे पेराल, तेच उगवेल. तुम्हाला तुमच्या कर्माचे फळ लगेच मिळते."

अश्विन पुढे म्हणाला, "जेव्हा स्टोक्सला जखमी खेळाडूच्या जागी दुसऱ्या खेळाडूला घेण्याबद्दल विचारले गेले, तेव्हा त्याने ही गोष्ट खूप हलक्यात घेतली. मी स्टोक्सच्या खेळाचा खूप मोठा चाहता आहे, पण त्याला या प्रश्नाचे उत्तर विचारपूर्वक द्यायला हवे होते. तुम्ही तुमच्या विचारांसाठी स्वतंत्र आहात, पण तुम्ही अशा विचारांना 'मस्करी' किंवा हास्यास्पद म्हणून टाळू शकत नाही."

अश्विनने दिलेल्या या प्रत्युत्तरामुळे, मैदानाबाहेर सुरु असलेल्या या शाब्दिक चकमकीत एक नवा ट्विस्ट आला आहे. स्टोक्सने केलेल्या टिप्पणीवर अश्विनने दिलेले हे उत्तर आता चर्चेचा विषय बनले आहे.