नवी दिल्ली: भविष्यातील युद्धे विमानांच्या संख्येवर नव्हे तर तंत्रज्ञानाच्या क्षमतेवर लढली जातील, असे प्रतिपादन संरक्षण मंत्री राजनाथ सिंह यांनी आज हवाई दलाच्या कमांडर्स परिषदेत बोलताना केले. आव्हानांचा सामना करण्यासाठी लष्कराच्या तिन्ही दलांनी एकत्र येत समन्वयाने काम करावे, असे आवाहन त्यांनी केले.

आधुनिक युद्धामध्ये आव्हानांचा मुकाबला करण्यासाठी आश्चर्याचा धक्का देणारी क्षमता असणे गरजेचे असल्याचे सांगत राजनाथ सिंह म्हणाले की, भविष्यातील युद्धे आणि संकटांचा सामना करण्यासाठी लष्कराला त्यांच्या क्षमता, गुप्तचर आणि लढण्याच्या तयारीला सतत मजबूत करावे लागेल. शत्रूला उत्तर देण्याची संधी मिळू नये, यासाठी लष्कराला आक्रमक आणि संरक्षणात्मक अशा दोन्ही क्षमतांच्या बाबतीत अचूक राहावे लागेल.

आधुनिक युद्धे आता केवळ पारंपारिक मैदानापर्यंत मर्यादित राहिलेली नाहीत. रशिया-युक्रेन तसेच इस्त्राईल-हमास यांच्यातील युद्धात ड्रोन, क्षेपणास्त्रे व हवाई संरक्षण प्रणालीचा पुरेपूर वापर करण्यात आला. यातून तंत्रज्ञानाची युद्धातील भूमिका वेगाने वाढत असल्याचे दिसून आले आहे. कामिकोज ड्रोन, इलेक्ट्रॉनिक युद्धनीती आणि सायबर, अवकाश यांसारख्या नव्या क्षेत्रातील आव्हाने पार पाडण्यासाठी हवाई दलाला विशेष यंत्रणा तयार करावी लागेल तसेच रणनीती आखावी लागेल.

‘एआय’ॲपचे सादरीकरण

‘ऑपरेशन सिंदूर’ दरम्यान हवाई दलाने केलेल्या कामगिरीचे सिंह यांनी कौतुक केले. त्या कारवाईवेळी तिन्ही दलांनी संयुक्तपणे काम करत शत्रूला पाणी पाजल्याचे सिंह म्हणाले. हवाई दलाच्या उडान विभागाच्या ‘एआय’ सेंटर ऑफ  एक्सलन्स’द्वारा विकसित ‘एआय’ॲपप्लिकेशन सिंह यांच्या हस्ते सुरू करण्यात आले. या ॲपची उपयोग ऑपरेशन्स, प्रशासन आणि अवकाश सुरक्षेशी संबंधित कामे स्वयंचलित आणि वेगाने करण्यासाठी केला जाणार आहे