Bharat Jodo Yatra: काँग्रेसची भारत जोडो यात्रा 7 सप्टेंबरपासून सुरू झाली आहे. या दरम्यान, काँग्रेस सरचिटणीस प्रियंका गांधी यांनी भाऊ राहुल गांधी यांच्या खांद्याला खांदा लावून भारत जोडो यात्रेत सहभागी होण्याचा निर्णय घेतला आहे. प्रियांका गांधी 19 ते 22 सप्टेंबर दरम्यान केरळमधील भारत जोडो यात्रेत (Bharat Jodo Yatra) सहभागी होणार आहे.

या भेटीदरम्यान राहुल गांधी 100 हून अधिक काँग्रेस नेते आणि कार्यकर्त्यांसह 12 राज्ये आणि 2 केंद्रशासित प्रदेशांमधून कन्याकुमारी ते काश्मीर अशी पदयात्रा काढणार आहेत. या प्रवासात 150 दिवसांत सुमारे 3500 किमी अंतर कापले जाणार आहे. या दौऱ्यात काँग्रेसने दोन सत्रात प्रवास करण्याचे ठरवले आहे. ही पदयात्रा सकाळी 7 ते 10.30 आणि सायंकाळी 3.30 ते 6.30 या वेळेत होणार आहे. या कालावधीत दररोज 22 ते 23 किलोमीटरचे अंतर कापता येईल, असे नियोजन करण्यात आले आहे.

दरम्यान, यावेळी अध्यक्षपदाच्या निवडणुकीबाबत काँग्रेसमध्ये गदारोळ सुरू आहे. त्यात मतदान करणाऱ्यांची यादी काँग्रेस अध्यक्षपदाच्या निवडणुकीपूर्वी जाहीर करण्याची मागणी अनेक नेत्यांनी लावून धरली आहे. यासोबतच काँग्रेस अध्यक्षपदाची निवडणूक लढवण्याबाबत राहुल गांधी यांनी मौन पाळले आहे. त्यामुळे सस्पेन्स वाढला आहे. अध्यक्षपदासाठी राहुल यांचे मन वळवण्याचे प्रयत्न सुरू असल्याचे काँग्रेसमधील काही लोकांचे म्हणणे आहे.

तर दुसरीकडे भारत जोडो यात्रेदरम्यान राहुल गांधी यांना काँग्रेस अध्यक्षपदासाठी निवडणूक लढविण्याबाबत विचारण्यात आले असता त्यांनी स्पष्ट उत्तर दिले नाही. राहुल म्हणाले की, मी निर्णय घेतला आहे आणि योग्य वेळ आल्यावर लोकांना त्याबद्दल माहिती देईन. आपल्या पदयात्रेतून जनतेच्या समस्या समजून घेण्यासाठी प्रयत्न केला जाणार असल्याचेही राहुल म्हणाले.