निवडणूक रणनीतीकार प्रशांत किशोर (Prashant Kishor) यांनी गुरुवारी काँग्रेस (Congress) नेते राहुल गांधी (Rahul Gandhi) यांच्यावर जोरदार निशाणा साधला आहे. प्रशांत किशोर यांनी ट्विट करत 'काँग्रेसचे नेतृत्व हा कोणा एका व्यक्तीचा दैवी अधिकार नाही, विशेषत: गेल्या 10 वर्षांत पक्षाने 90 टक्क्यांहून अधिक निवडणुका गमावल्या असताना.' असा हल्ला केला आहे. “एक मजबूत विरोधी पक्षासाठी, काँग्रेस ज्या विचारांचे प्रतिनिधित्व करते ते महत्त्वाचे आहे. पण काँग्रेसचे नेतृत्व हा कोणा एका व्यक्तीचा दैवी अधिकार नाही, विरोधी पक्षनेतृत्वाची निवडणूक लोकशाही पद्धतीने होऊ द्या." अशी मागणी देखील त्यांनी केली आहे. (Prashant Kishor slams Rahul Gandhi over Congress Chief issue)

काही महिन्यांपूर्वी प्रशांत किशोर काँग्रेसमध्ये प्रवेश करणार असल्याची अफवा पसरली होती. मात्र, आता त्यांनी प्रबळ विरोधी पक्षाचे नेतृत्व करण्याच्या काँग्रेसच्या कथित दाव्यावर प्रश्नचिन्ह उपस्थित केले आहे.प्रशांत किशोर यांनी पश्चिम बंगाल विधानसभा निवडणुकीत ममता बॅनर्जी यांच्या टीएमसीला विजय मिळवून देण्यात महत्त्वाची भूमिका बजावली होती.

त्याचबरोबर प्रशांत किशोर यांनी लखीमपूर खेरी घटनेवरही विधान केलं आहे. 'काँग्रेस या घटनेवर रातोरात जागा मिळवण्याचा प्रयत्न करत आहे.'लखीमपूर खेरीमध्ये केंद्रीय गृह राज्यमंत्री अजय मिश्रा टेनी यांची गाडी शेतकऱ्यांवर चढली होती.