नवी दिल्ली: परीक्षा पद्धतीतील सुधारणांसाठी पंतप्रधान नरेंद्र मोदी यांनी इन्फोसिसचे सहसंस्थापक नंदन नीलेकणी यांच्या नेतृत्वाखाली उच्चाधिकार कृती दलाची (टास्क फोर्स) स्थापना केली आहे. ‘‘विद्यार्थ्यांच्या भवितव्यासाठी सातत्याने विविध उपाय योजत असून, त्यांच्या भविष्याशी जे खेळतील, त्यांना तुरुंगात जावे लागेल,’’ असे मोदी यांनी सोशल मीडियाच्या माध्यमातून सांगितले.

‘नीट’च्या पेपरफुटीनंतर कॉक्रोच जनता पक्षाने जंतरमंतरवर ३६ दिवस आंदोलन केले. त्यामुळे केंद्रीय शिक्षणमंत्री धर्मेंद्र प्रधान यांना राजीनामा द्यावा लागला होता. या राजीनाम्यानंतर ‘सीजेपी’ने आंदोलन मागे घेतले असून, त्या पार्श्वभूमीवर या कृती दलाची स्थापना केली आहे. मोदी यांनी इन्स्टाग्रामद्वारे दिलेल्या व्हिडिओ संदेशामध्ये ही माहिती दिली. या कृती दलामध्ये तज्ज्ञांचा समावेश केला आहे. देशातील परीक्षा पद्धती अधिकाधिक सक्षम आणि पारदर्शक करण्यासाठी जास्तीत जास्त तंत्रज्ञानाचा वापर करण्याविषयी हे कृती दल सूचना करेल, असे मोदी म्हणाले.

विधेयक

प्रश्नपत्रिकाफुटीच्या विरोधातील कायदा अधिक कठोर करण्याच्या उद्देशाने केंद्र सरकार सोमवारी संसदेत विधेयक सादर करणार आहे. दोन वर्षांपूर्वी अंमलात आलेल्या कायद्यात सुधारणा करत अनेक कडक तरतुदी प्रस्तावित विधेयकात करण्यात आल्या आहेत. कॉक्रोच जनता पक्षाने केलेल्या आंदोलनाच्या पार्श्वभूमीवर कायद्यात बदल करण्याचा निर्णय केंद्र सरकारने घेतला होता.

सावंत म्हणाले...

‘नीट’ पेपरफुटीबाबत राज्‍यातील विद्यार्थ्यांनी छेडलेल्‍या आंदोलनाला माझा विरोध नाही; परंतु अशा आंदोलनांचा फायदा घेऊन देशद्रोह्यांना मुक्त करण्‍याची मागणी करणाऱ्यांना सोडणार नाही, असा स्पष्ट इशारा मुख्‍यमंत्री डॉ. प्रमोद सावंत यांनी रविवारी दिला.

नंदन नीलेकणी यांच्या नेतृत्वाखाली कृती दल परीक्षांमधील सुधारणांविषयी सूचना करणार आहे. त्यावरून परीक्षा पद्धती अधिक सक्षम करण्यासाठी सरकार पावले उचलेल. ‘एनटीए’च्या परीक्षा व्यवस्थेत तंत्रज्ञानाच्या वापराने सुधारणा करण्यासाठी, तसेच परीक्षा पद्धतीत संरचनात्मक बदल घडवून आणण्यास मदत होईल.

- नरेंद्र मोदी, पंतप्रधान