कोरोना (Covid-19) संसर्गाच्या दुसर्‍या लाटेला नियंत्रणात आणत असतांनाच तिसऱ्या लाटेच्या चर्चा (Covid19 Third Wave) भारतात सुरू आहे. त्यामुळे कोरोनाच्या तिसर्‍या लाटेबद्दल विचार करून लोक घाबरले आहेत. मात्र यावर मात करण्यासाठी देशभर लसीकरण अभियान वेगाने राबविले जात आहे. आणि त्याच वेगाने सोशल मीडियावर कोरोनाबद्दलही अफवा पसरत आहेत. कोरोनाच्या तिसर्‍या लाटेसंदर्भात आजकाल एक चित्र सोशल मीडियावर फिरत आहे. पीआयबी फॅक्ट चेकच्या पथकाने या चित्राची तपासणी केली आहे. (PIB Fact Check: Will there be a lockdown again)

सोशल मीडियावर शेअर केलेले फोटो एका टीव्ही न्यूज चॅनेलचा स्क्रीनशॉट आहे. ज्यामध्ये असे लिहिले आहे की, देशात कोरोनाची (Covid-19) तिसरी लाट सुरू झाली आहे, अशी घोषणा पंतप्रधान मोदी यांनी केली आहे. यानंतर 1 जुलै ते 31 जुलै दरम्यान कडक लॉकडाउन करण्यात येणार असे लिहिले आहे. पीआयबीने ही बातमी बनावट असल्याचे सांगितले आहे.

पीआयबीने काय म्हटले?

या फोटोसंदर्भात पीआयबीने ट्विट करुन लिहिले आहे की, कोरोनाची तिसरी लाट देशात सुरू झाली असून पुन्हा कडक लॉकडाउन लावण्याचा दावा पंतप्रधान मोदी यांनी केला आहे. अशा प्रकारची कोणतीही घोषणा पंतप्रधानांनी केलेली नाही. कृपया असे दिशाभूल करणारे संदेश शेअर करू नका आणि कोरोना रोखण्यासाठी कोविड योग्य वर्तन स्वीकारले पाहिजे. पीआयबीने लिहिले की, कोरोनाची तिसऱ्या लाटेसंदर्भात आणि लॉकडाउन लागू करण्याबाबत पंतप्रधान मोदींनी कोणतीही घोषणा केलेली नाही.

देशात कोरोना संक्रमणाची स्थिती

केंद्रीय आरोग्य मंत्रालयाने बुधवारी सकाळी जाहीर केलेल्या आकडेवारीनुसार, गेल्या 24 तासांत देशात कोरोनाचे 45,951 नवीन रुग्ण आढळले आहेत. त्याच वेळी रिकवरी रेट वाढून 96.92 झाला आहे. कोरोनाचा नवा प्रकार 'डेल्टा प्लस' आता जगभरात वेगाने पसरत आहे. यामुळे बर्‍याच देशांमध्ये पुन्हा लॉकडाउन लागण्याची शक्यता आहे. यापूर्वीही कोरोना संसर्गाबाबत बनावट बातम्या व्हायरल झाल्या आहेत. ज्याबद्दल पीआयबी तपास करत आहे आणि लोकांना रियल फॅक्ट समजावून सांगत अफवांपासून जागृत करत आहे.